ఎద్దుల పందెం కోసం రోడ్డును నిర్బంధించిన యువత
తమిళనాడులోని కృష్ణగిరి- బెంగళూరు హైవేను యువకులు నిర్బంధించారు. ఎద్దుల పందేనికి జిల్లా యంత్రాంగం అనుమతి ఇవ్వాలని రోడ్డుపై బైటాయించారు. దీంతో హైవేపై రాకపోకలకు తీవ్ర అంతరాయం కలిగింది. దాదాపు మూడు గంటల పాటు వాహనాలు రోడ్డుపైనే నిలిచిపోయాయి. కృష్ణగిరి జిల్లా గోబసందిరం గ్రామం సమీపంలో ఈ ఆందోళనలు జరిగాయి.
వివరాల్లోకి వెళితే..గురువారం గోబసందిరం గ్రామం సమీపంలో ఎద్దుల పందేలు జరగనున్నట్లు ప్రచారం జరిగింది. దీంతో వందల మంది యువకులు.. తమ ఎద్దులతో ఉదయాన్నే అక్కడికి చేరుకున్నారు. పోటీలను చూద్దామని మరి కొంత మంది వచ్చారు. పోటీల గురించి సమాచారం అందుకున్న పోలీసులు.. పందేన్ని అడ్డుకున్నారు. దీంతో ఆగ్రహించిన యువత.. రోడ్డుపై బైటాయించారు. ఎద్దుల పోటీలకు అనుమతి ఇవ్వాలంటూ ఆందోళనలు చేశారు.