33% తగ్గిన భారత ఆయుధాల దిగుమతి!

భారత ఆయుధాల దిగుమతి 2011-15తో పోలిస్తే.. 2016-20లో 33 శాతం క్షీణించిందని సిప్రీ నివేదిక వెల్లడించింది. రష్యాపై ఆధారపడటాన్ని తగ్గించటం, దేశీయ రక్షణ పరిశ్రమకు ఊతమిచ్చేందుకు తీసుకున్న చర్యలే కారణంగా తెలిపింది.

2011-15తో పోలిస్తే 2016-20 కాలంలో భారత​ ఆయుధాల దిగుమతి 33 శాతం మేర క్షీణించిందని స్వీడెన్​కు చెందిన సిప్రీ నివేదిక తెలిపింది. ఫలితంగా సరఫరాదారు రష్యా అమితంగా ప్రభావితమైనట్లు పేర్కొంది. భారత్​కు అమెరికా నుంచి ఆయుధాల దిగుమతి కూడా 46 శాతానికిపైగా క్షీణించినట్లు వెల్లడించింది.

భారత్​ అనుసరిస్తున్న సంక్లిష్ట కొనుగోలు విధానంతో పాటు రష్యా ఆయుధాలపై ఆధారపడటాన్ని తగ్గించే ప్రయత్నం కూడా అందుకు కారణమని తెలిపింది నివేదిక. అయితే.. రాబోయే రోజుల్లో పలువురు సరఫరాదారుల నుంచి భారత్ పెద్దఎత్తున​ ఆయుధాలు దిగుమతి చేసుకునేందుకు ప్రణాళిక చేస్తున్నట్లు సిప్రీ తెలిపింది.

దిగుమతులపై ఆధారపడటం తగ్గించి, దేశీయ రక్షణ పరిశ్రమకు ఊతమిచ్చేందుకు కొన్నేళ్ల నుంచి భారత్​ పలు చర్యలు చేపడుతోంది. వాటికి మూలధన సేకరణ కోసం దాదాపు రూ.2లక్షల కోట్లు విలువ చేసే 112 ప్రతిపాదనలకు ఆమోదం తెలిపినట్లు రాజ్యసభలో కేంద్రమంత్రి శ్రీపాద నాయక్​ తెలిపారు.

ఇదీ చూడండి:పీఎం కేర్స్ విరాళాల​పై లోక్​సభలో గందరగోళం