Afghan crisis: 'భారత పౌరులను తరలించేందుకే తొలి ప్రాధాన్యం'

తాలిబన్ల ఆక్రమణలోకి వెళ్లిన అఫ్గానిస్థాన్​పై(Afghan crisis) కేంద్ర ప్రభుత్వం అఖిలపక్ష సమావేశం(all party meeting) నిర్వహించింది. అఫ్గాన్​లో తాజా పరిస్థితులు, భారత పౌరుల తరలింపు వంటి అంశాలను విదేశాంగ మంత్రి జైశంకర్​ నేతలకు వివరించారు. అఫ్గాన్​ నుంచి భారత పౌరులను తరలించేందుకే తమ తొలి ప్రాధాన్యమని చెప్పారు.

అఫ్గానిస్థాన్‌లో అత్యంత క్లిష్టమైన పరిస్థితులు నెలకొన్న వేళ భారత పౌరులను తరలించేందుకు అత్యంత ప్రాధాన్యం ఇస్తున్నట్లు విదేశాంగ మంత్రి జైశంకర్‌ తెలిపారు. అఫ్గానిస్థాన్​ సంక్షోభంపై(Afghan crisis) అఖిలపక్ష సమావేశం(all party meeting) సందర్భంగా ఈ వ్యాఖ్యలు చేశారు.

విదేశాంగ శాఖ మంత్రి జైశంకర్‌ అధ్యక్షతన పార్లమెంట్​ ప్రాంగణంలో ఈ సమావేశం నిర్వహించారు. అఫ్గాన్​లో తాజా పరిస్థితులు, భారత పౌరుల తరలింపు తదితర కీలక అంశాలపై అఖిలపక్ష నేతలకు జైశంకర్​ వివరించారు.

హాజరైన వివిధ పార్టీల నేతలు

" సాధ్యమైనంత మేరకు అఫ్గానిస్థాన్​ నుంచి ప్రజలను తరలించేందుకు భారత్​ ప్రయత్నిస్తోంది. అయితే.. భారత పౌరులను తరలించటమే మా తొలి ప్రాధాన్యం. అఫ్గాన్​లో పరిస్థితులు చాలా క్లిష్టంగా ఉన్నాయి. దోహా ఒప్పందాన్ని తాలిబన్లు ఉల్లంఘించారు. "

- జైశంకర్​, విదేశాంగ శాఖ మంత్రి.

ఈ భేటీకి.. పార్లమెంటు వ్యవహారాల శాఖ మంత్రి ప్రహ్లాద్‌ జోషి, పియూష్‌ గోయల్‌తో పాటు మరికొందరు మంత్రులు సహా కాంగ్రెస్‌ తరఫున అధీర్‌ రంజన్‌ చౌదురీ, మల్లికార్జున ఖర్గే, ఆనంద్‌శర్మ, ఎన్​సీపీ తరఫున శరద్‌పవార్‌, జేడీఎస్​ నుంచి మాజీ ప్రధాని దేవెగౌడ, తెరాస తరఫున నామా నాగేశ్వరరావు, తెలుగుదేశం పార్టీ నుంచి గల్లా జయదేవ్‌, వైకాపా నుంచి మిథున్‌రెడ్డి తదితరులు హాజరయ్యారు.

ఇదీ చూడండి:Afghan Crisis: కాబుల్​ నుంచి భారత్​కు మరో 35 మంది