Goa Election 2022: కాంగ్రెస్ నేత రాహుల్ గాంధీ మోదీ ఫోబియాతో బాధపడుతున్నారని ఎద్దేవా చేశారు కేంద్ర హోంమంత్రి అమిత్ షా. రాహుల్కు ప్రధాని నరేంద్ర మోదీ అంటే భయమని పేర్కొన్నారు. స్థిరత్వం ఉంటేనే అభివృద్ధికి ఆస్కారం ఉంటుందని తెలిపారు. గోవా ఎన్నికల నేపథ్యంలో ఆ రాష్ట్రంలో ఆదివారం పర్యటించిన షా.. ఈ వ్యాఖ్యలు చేశారు.
మీరే నిర్ణయించుకోండి..
భాజపా తెచ్చే 'బంగారు గోవా' కావాలో లేక రాష్ట్రం 'గాంధీ కుటుంబానికి చెందిన గోవా'గా మారాలో ప్రజలే నిర్ణయించుకోవాలన్నారు షా. ఇతర రాష్ట్రాలకు చెందిన పార్టీలు కూడా గోవా ఎన్నికల్లో పోటీ చేస్తున్నాయని.. కానీ అవి ప్రభుత్వాన్ని ఏర్పాటు చేయలేవని ఆప్, టీఎంసీని ఉద్దేశించి విమర్శించారు. అది కేవలం భాజపాకే సాధ్యం అని అన్నారు. చిన్న రాష్ట్రాల అభివృద్ధికే మోదీ ప్రభుత్వం ప్రాధాన్యం ఇస్తుందని చెప్పుకొచ్చారు.