ఉత్తర్ప్రదేశ్ జౌన్పుర్లో దారుణం జరిగింది. ఓ యువతిపై అత్యాచారానికి పాల్పడ్డారు నలుగురు యువకులు. అనంతరం కత్తితో పొడిచి హత్యచేసి.. బావిలో పడేశారు. కొన్ని రోజుల క్రితం జరిగిన ఈ అమానవీయ ఘటన తాజాగా వెలుగులోకి వచ్చింది. నలుగురు నిందితుల్ని బక్ష పోలీసులు బుధవారం అరెస్టు చేసి జైలుకు పంపారు. బాధితురాలి హత్యకు ఉపయోగించిన కత్తిని పోలీసులు స్వాధీనం చేసుకున్నారు.
పోలీసులు తెలిపిన వివరాల ప్రకారం:
జౌన్పుర్లోని బక్ష పోలీస్ స్టేషన్ పరిధిలో నివసిస్తున్న ఓ యువతి జులై 23న తన ప్రియుడిని కలిసేందుకు వెళ్లింది. అప్పుడు అక్కడ ఉన్న ప్రియుడి స్నేహితులు నలుగురు ఆమెపై అఘాయిత్యానికి పాల్పడ్డారు. అనంతరం హత్యచేసి.. బావిలో పడేశారు. బాధితురాలి తండ్రి జులై 23న బక్ష పోలీస్ స్టేషన్లో తన కుమార్తె కనిపించట్లేదని ఫిర్యాదు చేశాడు. జులై 28న యువతి మృతదేహం స్వగ్రామంలోనే ఓ పాతబావిలో కనిపించింది. సమాచారం అందుకున్న పోలీసులు ఘటనా స్థలానికి చేరుకుని యువతి మృతదేహాన్ని పోస్టుమార్టం నిమిత్తం ఆసుపత్రికి తరలించారు. అనంతరం కేసు దర్యాప్తును పోలీసులు వేగవంతం చేశారు. ఆగస్టు 2న బాధితురాలి తండ్రి తన కుమార్తెను హత్య చేశారని నలుగురు యువకులపై పోలీసులకు ఫిర్యాదు చేశాడు. వీరిని విచారించగా.. నేరం చేసినట్లు పోలీసుల ఎదుట ఒప్పుకున్నారు.