పుదుచ్చేరిలో సీఎం సీటుపై భాజపా కన్ను!

పుదుచ్చేరి శాసనసభ ఎన్నికల్లో ఎన్​డీఏ విజయదుందుభి మోగించింది. మొత్తం 30 స్థానాల్లో 16 స్థానాలు కూటమి సొంతం చేసుకుని మ్యాజిక్ ఫిగర్​ను దాటేసింది. అయితే ఆరు స్థానాల్లో గెలిచిన భాజపా.. సీఎం సీటుపై కన్నేసినట్లు తెలుస్తోంది.

పుదుచ్చేరి శాసనసభ ఎన్నికల్లో మొత్తం 30 స్థానాల్లో.. ఎన్​డీఏ 16 సీట్లు సాధించి విజయకేతనం ఎగురవేసింది. అయితే ముఖ్యమంత్రి ఎవరు? ఏ పార్టీనుంచి ఉంటారు? అనే సందిగ్ధం ప్రస్తుతం కేంద్రపాలిత ప్రాంతంలో కొనసాగుతోంది.

'సీఎం సీటు మాకే'!

ఈ ఎన్నికల్లో అన్నాడీఎంకే, రంగస్వామి కాంగ్రెస్​తో కలిసి కూటమిగా ఏర్పడింది భాజపా. తొమ్మిది స్థానాల్లో పోటీ చేసి.. ఆరు స్థానాల్లో విజయం సాధించింది. తమకు ముఖ్యమంత్రి సీటు కావాలని భాజపా పట్టుబడుతున్నట్లు ఊహాగానాలు వస్తున్నాయి.

ఎన్నికల తరువాత తానే ముఖ్యమంత్రిని అవుతానని ఎన్​ఆర్ కాంగ్రెస్ నేత రంగస్వామి ఇప్పటివరకు చెప్పుకుంటూ రావడం గమనార్హం.

అన్నాడీఎంకే డీలా

పుదుచ్చేరిలో మొట్టమొదటిసారి ప్రభుత్వాన్ని ఏర్పాటు చేసిన అన్నాడీఎంకే.. 2021 ఎన్నికల్లో మాత్రం ఘోరంగా విఫలమైంది. అన్నాడీఎంకే ఐదు స్థానాల నుంచి బరిలోకి దిగగా.. ఒక్కసీటు కూడా సాధించలేక చతికిలపడింది.

పుదుచ్చేరిలో ముఖ్యమంత్రి ప్రమాణస్వీకారోత్సవం శుక్రవారం జరిగే అవకాశం ఉంది.

ఇదీ చదవండి :పుదుచ్చేరిలో విజయఢంకా మోగించిన ఎన్​డీఏ