'ఉగ్రవాదంపై పోరు, వాతావరణ మార్పులే అజెండా'

ఉగ్రవాదం, వాతావరణ మార్పులే ప్రధాన అజెండాగా జీ-20 సదస్సులో చర్చిస్తామని ప్రధాని నరేంద్ర మోదీ స్పష్టం చేశారు. జపాన్​లోని ఒసాకాలో జరిగే ఈ సదస్సుకు బయలుదేరే ముందు ప్రధాని ఈ ప్రకటన చేశారు. ప్రపంచ దేశాల మధ్య పరస్పర సంబంధాలతోనే అభివృద్ధి సాధ్యమని ఉద్ఘాటించారు.

జపాన్​లో జరిగే జీ-20 దేశాల సదస్సులో ఉగ్రవాద సమస్యపై కీలకంగా చర్చిస్తామని ప్రధాని నరేంద్రమోదీ స్పష్టం చేశారు. వాతావరణ మార్పులు, ఇతర అంతర్జాతీయ సమస్యలపైనా అన్ని దేశాల భాగస్వామ్యాన్ని కూడగట్టేందుకు ప్రయత్నిస్తామని తెలిపారు. జపాన్​కు బయలుదేరే ముందు పర్యటనలో చర్చించే అంశాలపై ప్రకటన చేశారు ప్రధాని.

"మహిళా సాధికారత, డిజిటలైజేషన్, కృత్రిమ మేధ, సుస్థిరాభివృద్ధి లక్ష్యాల సాధనలో అంతర్జాతీయ సవాళ్లను ప్రపంచం దృష్టికి తీసుకెళతాం. ఉగ్రవాదం, వాతావరణ మార్పులపై ప్రముఖంగా చర్చిస్తాం. జీ-20 వేదికలో ఈ అంశాలే భారత ప్రధాన అజెండా."

-నరేంద్ర మోదీ, ప్రధాన మంత్రి

బహుళ పాక్షిక సంబంధాల సంస్కరణకు జీ-20 దేశాల సదస్సు చక్కటి వేదికని మోదీ అభిప్రాయపడ్డారు. వేగంగా మారుతోన్న అంతర్జాతీయ సమాజంలో వివిధ దేశాల సహకారం కీలకమని వ్యాఖ్యానించారు.

"గత ఐదేళ్లలో భారత్​ సాధించిన అభివృద్ధిని పంచుకునేందుకు ఇదొక మంచి వేదిక. ప్రభుత్వానికి ప్రజలు అందించిన మద్దతుతో భారత్​ ఈ మార్గంలో స్థిరంగా దూసుకుపోతుంది."

-నరేంద్ర మోదీ, ప్రధాన మంత్రి

సదస్సులో భాగంగా రష్యా, చైనా అధినేతలతో మోదీ ప్రత్యేకంగా భేటీ కానున్నారు. బ్రిక్స్​ దేశాల నేతలతో పాటు జై (జపాన్​, అమెరికా, భారత్​) అధినేతలతోనూ సమావేశమవుతారు.

ఇదీ చూడండి: ఐక్యరాజ్యసమితిలో భారత్ మరో దౌత్య విజయం