ప్రపంచంలోనే తొలి 'చిల్డ్రన్​ న్యూట్రిషన్​ పార్క్'

పిల్లలు ఏ ఆహారం తినాలో, ఏది తినకూడదో మనం ఇంట్లో చెబుతూనే ఉంటాం. కానీ, వారికి ఆ మాటలు అర్థమే కావు, ఫలితంగా చిన్నారుల ఆరోగ్యాలపై ప్రభావం పడుతోంది. కానీ, ఒక్కసారి గుజరాత్​లోని ఆ పార్క్​కు తీసుకువెళితే.. ఇట్టే అర్థమైపోతుంది. అదెలా సాధ్యమనుకుంటున్నారా?  అయితే ఈ కథనం చదవాల్సిందే...

విదేశీ వంటకాలను మనం లొట్టలేసుకుంటూ తినేస్తాం.. అది చూసి మన పిల్లలూ అదే మార్గంలో నడుస్తారు. భారతీయ వంటకాలు, పౌష్టిక ఆహారాన్ని వదిలి పాశ్చాత్య ఆహార పదార్థాలకు అలవాటు పడిపోయాక.. అవి ఆరోగ్యకరం కాదు మానేయండీ అంటే వింటారా? ఊహూ.. ప్రసక్తే లేదు. అందుకే, వారితో చెడు ఆహార అలవాట్లను మాన్పించి పోషకాహార విలువలు తెలియజేసేందుకు 'చిల్డ్రన్​ న్యూట్రిషన్​ పార్క్'​ను ఏర్పాటు చేసింది గుజరాత్ ప్రభుత్వం.

ప్రపంచంలోనే తొలిసారి...

ప్రపంచంలోనే ఎత్తయిన ఐక్యతా విగ్రహానికి అతి సమీపంలో.. నర్మద నదీ తీరాన కేవాడియాలో 20 వేల చదరపు అడుగుల విస్తీర్ణంలో ఏర్పాటైంది ఈ చిల్డ్రన్​ న్యూట్రిషన్​ పార్కు. ఈ ఉద్యానవనంలో స్వదేశీ వంటకాల విలువలు తెలిపే త్రీడీ సినిమాలు, ఆరోగ్యకరమైన ఆహార అలవాట్లు చెప్పే కార్టూన్లు.. ప్రకృతి విలువ తెలియజేసే నిర్మాణాలు.. వినూత్నమైన ఫుట్​బాల్ కోర్ట్​లు, కళ్లు మిరుమిట్లుగొలిపే లేజర్​ షోలు.. ఒక్కటేమిటి అన్నీ పిల్లలను ఆకట్టుకునేవే.

ఇక్కడ ప్రతీ నిర్మాణం పోషకార ఆవశ్యకతను ఈ తరం బాలబాలికలకు అర్థమయ్యే రీతిలో తయారు చేశారు. ప్రపంచంలోనే ఇలా పిల్లల పోషకాహారానికి ఇంతలా ప్రాధాన్యత ఇస్తూ రూపుదిద్దుకున్న తొలి పార్కు ఇదే. అందుకే ప్రధాని నరేంద్ర మోదీ సైతం ఈ పార్కు ఏర్పాటుపై ప్రత్యేక ఆసక్తి కనబరచారు.

పోషక రైలు..

ఈ పార్కులో ​ప్రత్యేక ఆకర్షణగా నిలుస్తోందీ న్యూట్రీ రైలు. 600 మీటర్ల పొడవైన పట్టాలపై చక్కర్లు కొట్టే ఈ ట్రైన్​ ఐదు స్టేషన్లలో ఆగుతుంది. ఒక్కో స్టేషన్​లో ఒక్కో రకమైన పోషకాలను ఈ రైలు పరిచయం చేస్తోంది.

మొదటి స్టేషన్​లో కూరగాయలు, పండ్లలో ఉండే పోషకాల గురించి వివరిస్తే.. రెండవ స్టేషన్​లో పాలు, మూడవ స్టేషన్​లో ఇంటి వంటకాలు, నాల్గవ స్టేజీలో నీటి ప్రాముఖత ఆఖర్లో మాత్రం వినోదాన్ని పంచే గేమ్​జోన్​ యాత్ర చేపిస్తోందీ రైలు.

అన్నీ ప్రత్యేకమే

'సిగ్నేచర్​ న్యూట్రిషన్..​ దేశ్​ రోషన్' అనే నినాదంతో ముందుకెళ్తున్న ఈ పార్కు పిల్లల ఆరోగ్య పాఠశాలగా మారింది. పిల్లలకు పౌష్టిక విలువలు వివరిస్తూ. భావి తరాల ఆరోగ్యాలను కాపాడే ప్రయత్నం చేస్తోంది.

వినోదంతో విజ్ఞానాన్ని పంచేందుకు.. నిధి శోధన, సైక్లింగ్​, ఫుట్​బాల్ కోర్ట్​ వంటి ఆసక్తికర ఆటలనూ ఏర్పాటు చేశారు నిర్వాహకులు. అంతేనా.. ఆనందాన్ని సెల్​ఫోన్​లో బంధించేందుకు ప్రత్యేక సెల్ఫీ పాయింట్ కూడా ఉంది.

ఇంతలోనే అంత మంది..

పిల్లలను అమితంగా ఆకట్టుకుంటున్న ఈ పార్కు ఇంకా అధికారికంగా ప్రారంభం కాలేదు. అయితే, ట్రయల్​ బేస్​ కోసం రెండు నెలల క్రితం తెరుచుకున్న ఈ పోషకాహార ఉద్యానవనాన్ని ఇప్పటికే 15 వేల మందికిపైగా సందర్శించారు. ఇందులో దాదాపు 10 వేల మంది చిన్నారులే. ఐక్యతా విగ్రహాన్ని చూసేందుకు వచ్చే పర్యటకుల్లో చాలామంది ఇటువైపు ఓ లుక్కేస్తున్నారు.

ఇదీ చదవండి:దేశంలోనే తొలిసారిగా దిల్లీలో శాస్త్రీయ ఉద్యానం