సంక్షోభం నుంచి దృష్టి మళ్లించేందుకే 'గ్రామ వాస్తవ్య'

కర్ణాటక ముఖ్యమంత్రి కుమారస్వామి తలపెట్టిన పల్లె నిద్ర కాంగ్రెస్-జేడీఎస్ సంకీర్ణ సంక్షోభం నుంచి దృష్టి మళ్లించేందుకేనని కేంద్రమంత్రి సదానంద గౌడ విమర్శించారు. పల్లెనిద్ర కేవలం సీఎం చేస్తున్న జిమ్మిక్కు మాత్రమేననన్నారు.

'గ్రామ వాస్తవ్య' పేరుతో కర్ణాటక ముఖ్యమంత్రి కుమారస్వామి చేస్తున్న పల్లెనిద్రపై విమర్శనాస్త్రాలు సంధించారు కేంద్ర రసాయన, ఎరువుల శాఖమంత్రి డీవీ సదానందగౌడ. కాంగ్రెస్-జేడీఎస్ కూటమిలో నెలకొన్న సంక్షోభం నుంచి దృష్టి మళ్లించేందుకు సీఎం జిమ్మిక్కులు చేస్తున్నారని ఆరోపించారు.

గ్రామాల్లో నెలకొన్న సమస్యలను తెలుసుకుని, పరిష్కరించేందుకు ఈ పల్లెనిద్రను తలపెట్టారు కన్నడ సీఎం. తాను ముఖ్యమంత్రిగా ఉన్న 2006-07 మధ్యకాలంలోనూ ఈ కార్యక్రమాన్ని అమలు చేశారు.

"సీఎం గతంలోనూ పల్లెనిద్రలు చేశారు. కానీ అక్కడి సమస్యలు పరిష్కారం కాలేదు. ప్రస్తుతం ఆయన సంక్షోభంలో ఉన్న ప్రభుత్వాన్ని రక్షించుకునేందుకు ప్రయత్నిస్తున్నారు. దాన్నుంచి దృష్టి మళ్లించేందుకే పల్లెనిద్రకు తెరతీశారు."

-సదానంద గౌడ, కేంద్ర రసాయన, ఎరువుల శాఖమంత్రి

సంకీర్ణం కూలిపోతే ప్రత్యామ్నాయం

కాంగ్రెస్-జేడీఎస్​ ప్రభుత్వం కూలిపోతే ప్రత్యామ్నాయంపై ఆలోచిస్తామని వెల్లడించారు సదానంద గౌడ. అభివృద్ధి విషయంలో రాజకీయాలు చేయడం తమ విధానం కాదని స్పష్టంచేశారు. ప్రభుత్వాన్ని స్వయంగా వారు కూల్చేసుకుంటే అతిపెద్ద పార్టీగా ప్రత్యామ్నాయానికై ఆలోచించడం తమ బాధ్యతన్నారు సదానంద.