మాజీ ఐపీఎస్​ సంజీవ్​ భట్​కు జీవితఖైదు

కస్టడీలో ఉన్న వ్యక్తి మృతికి కారణమైన 29 ఏళ్ల నాటి కేసులో.. మాజీ ఐపీఎస్​ అధికారి సంజీవ్​ భట్​కు జీవితఖైదు విధించింది గుజరాత్​ జామ్​నగర్​ సెషన్స్​ కోర్టు. 2011లో ఐపీఎస్​ హోదా నుంచి బహిష్కరణకు గురయ్యారు భట్​. ఆయన​తో పాటు మరో ఆరుగురిని దోషులుగా తేల్చింది న్యాయస్థానం.

29 ఏళ్ల నాటి కస్టడీలో వ్యక్తి మృతి కేసులో మాజీ ఐపీఎస్​ అధికారి సంజీవ్​ భట్​ను దోషిగా తేల్చింది జామ్​ నగర్​ సెషన్స్​ కోర్టు. ఆయనతో పాటు మరో ఆరుగురు పోలీసులను దోషులుగా ప్రకటించింది.

భట్​తో సహా మరో పోలీస్​ కానిస్టేబుల్​ ప్రవీణ్​ సింగ్​ జాలాకు భారతీయ శిక్షాస్మృతి-302 ప్రకారం జీవిత ఖైదు విధించింది. ఎస్​ఐ దీపక్​ షా, శైలేశ్​ పాండ్య, కానిస్టేబుళ్లు ప్రవీణ్​ ​సింగ్​ జడేజా, అనోప్​ సింగ్​ జెథ్వా, కేషుబా జడేజాలకు రెండేళ్లు జైలు శిక్ష ఖరారు చేసింది.

ఇదీ జరిగింది..

1990 అక్టోబర్​ 30న మతఘర్షణల కారణంతో గుజరాత్​లోని జామ్​జోధ్​పుర్​లో 150 మందిని అదుపులోకి తీసుకున్నారు. అప్పుడు అదనపు ఎస్పీగా సంజీవ్​ భట్​ ఉన్నారు. అనంతరం వారందరినీ విడిచిపెట్టగా.. ప్రభుదాస్​ వైష్ణాని అనే వ్యక్తి ఆసుపత్రిలో మరణించారు.

బాధితుడి సోదరుడి ఫిర్యాదు మేరకు భట్​తో పాటు మరో ఆరుగురు పోలీసు అధికారులపై ఎఫ్​ఐఆర్​ నమోదైంది. నిర్బంధంలో ఉంచి చిత్రహింసలు పెట్టడం వల్లే వైష్ణాని మరణించాడని ఆరోపించారు ఆయన సోదరుడు. అప్పట్లో భట్​పై విచారణకు అనుమతి ఇవ్వలేదు రాష్ట్ర​ ప్రభుత్వం.

29 ఏళ్ల తర్వాత నేడు జామ్​నగర్​ సెషన్స్​ కోర్టు వీరిని దోషులుగా తేల్చి శిక్షలు విధించింది.

2011లో బహిష్కరణ..

2011లో ఐపీఎస్​ హోదా నుంచి సంజీవ్​ భట్​ బహిష్కరణకు గురయ్యారు. అనంతరం అనధికారంగా విధులకు హాజరుకాని కారణంగా హోం మంత్రిత్వ శాఖ ఈయనను తొలగించింది.

ఓ వ్యక్తి మాదకద్రవ్యాలు కలిగి ఉన్నాడనే తప్పుడు కేసు నమోదు చేశారన్న ఆరోపణలతో 2018 సెప్టెంబర్​ 5న మరోసారి అరెస్టయ్యారు భట్​. ఈ కేసు ఇంకా విచారణలోనే ఉంది.