కాలిన గాయాలతో చికిత్సపొందుతూ దిల్లీలోని సఫ్దర్జంగ్ ఆస్పత్రిలో శుక్రవారం కన్నుమూసిన ఉన్నావ్ అత్యాచార బాధితురాలి మృతదేహాన్ని ఆమె స్వస్థలమైన యూపీలోని ఉన్నావ్ గ్రామానికి తరలించారు.శనివారంరాత్రి9గంటలకుబాధితురాలి మృతదేహం ఉన్నావ్‌చేరుకుంది. కాటేసిన కామాంధుల చేతిలోనే మరోసారి దాడికి గురై, ప్రాణాలు కోల్పోయిన బాధితురాలిని చూసి ఉన్నావ్ శోకసంద్రమైంది. బాధితురాలి ఇంటివద్దకు పెద్దఎత్తున ప్రజలు చేరుకోగా.. ఎలాంటి అవాంఛనీయ ఘటనలు తలెత్తకుండా అధికారులు కట్టుదిట్టమైన భద్రతా ఏర్పాట్లు చేశారు.
రూ.25లక్షల పరిహారం అందజేత..
యోగి సర్కారు ప్రకటించిన రూ.25 లక్షల పరిహారాన్ని బాధితురాలి కుటుంబానికి అందజేశారు యూపీ కార్మికశాఖ మంత్రి స్వామి ప్రసాద్ మౌర్య. బాధితురాలి తండ్రికి చెక్‌ను ఇచ్చారు. భవిష్యత్తులో అన్ని విధాల అండగా ఉంటామని హామీ ఇచ్చారు. ప్రధాన మంత్రి ఆవాస్ యోజన కింద ఇల్లు నిర్మించి ఇస్తామని తెలిపారు.
అంతకుముందు బాధిత కుటుంబాలను పరామర్శించేందుకు వచ్చిన మంత్రుల బృందాన్ని నిరసనకారులు అడ్డుకున్నారు. అక్కడ కాసేపు ఉద్రిక్త వాతావరణం ఏర్పడింది. పోలీసులు రంగప్రవేశం చేసి పరిస్థితిని అదుపులోకి తెచ్చారు.
ఇదీ చూడండి: అత్యాచార నిందితుడిపై న్యాయవాదుల దాడి
