ఆపరేషన్​ కరోనా: సీఎంలతో రేపు మోదీ భేటీ

15:47 May 10

కరోనా వేళ.. దేశ పరిస్థితులపై చర్చించేందుకు ప్రధాని నరేంద్ర మోదీ మరోసారి అన్ని రాష్ట్రాల ముఖ్యమంత్రులతో భేటీ కానున్నారు. సోమవారం మధ్యాహ్నం 3 గంటలకు వీడియో కాన్ఫరెన్స్​ ద్వారా సమావేశం జరగనున్నట్లు ప్రధాన మంత్రి కార్యాలయం వెల్లడించింది.  

దేశవ్యాప్తంగా లాక్​డౌన్​ అమలవుతున్న విధానాన్ని సమీక్షించనున్నారు ప్రధాని. మే 17తో లాక్​డౌన్​ గడువు తీరనున్న నేపథ్యంలో.. తదుపరి అనుసరించాల్సిన వ్యూహాలు, అవలంబించాల్సిన విధానాలు తదితర అంశాలపై ముఖ్యమంత్రుల అభిప్రాయాలు స్వీకరించనున్నారు.  

లాక్​డౌన్​ ఎత్తివేత, ఆర్థిక వ్యవస్థను చక్కదిద్దడం వంటి వ్యూహాలపైనా సీఎంలతో చర్చించనున్నట్లు సమాచారం.  

ఈ సారి భేటీకి కేంద్ర హోం, ఆర్థిక, ఆరోగ్య శాఖ మంత్రులు కూడా హాజరవనున్నట్లు తెలుస్తోంది. గత సమావేశంలో కొంతమంది సీఎంలకే మాట్లాడే అవకాశం ఇచ్చిన ప్రధాని.. ఈసారి అందరినీ మాట్లాడాలని కోరినట్లు సమాచారం.

ఐదోసారి...

దేశంలో లాక్​డౌన్​ పరిస్థితులపై ముఖ్యమంత్రులతో మోదీ భేటీ కావడం ఇది ఐదోసారి. జనతా కర్ఫ్యూ విధించే ముందు మార్చి 22న తొలిసారి సీఎంలతో మాట్లాడారు. తర్వాత వేర్వేరు సందర్భాల్లో లాక్​డౌన్​ పొడిగింపునకు... ముఖ్యమంత్రుల అభిప్రాయాలు కోరేందుకు పలుమార్లు మోదీ వీడియోకాన్ఫరెన్స్​లు నిర్వహించారు. ఏప్రిల్​ 27న చివరిసారిగా సమావేశమయ్యారు.  

కరోనా దృష్ట్యా.. దేశవ్యాప్తంగా మార్చి 25 నుంచి లాక్​డౌన్​ అమల్లో ఉంది. అనంతరం.. వైరస్​ తీవ్రతను బట్టి ఇప్పటికి రెండు సార్లు లాక్​డౌన్​ను పొడిగించింది కేంద్రం.  

15:13 May 10

రేపు రాష్ట్రాల సీఎంలతో ప్రధాని మోదీ వీడియో కాన్ఫరెన్స్

సోమవారం మధ్యాహ్నం 3గంటలకు అన్ని రాష్ట్రాల సీఎంలతో ప్రధాని మోదీ వీడియో కాన్ఫరెన్స్​ నిర్వహించున్నారు. ఈ మేరకు ప్రధానమంత్రి కార్యాలయం ట్విట్టర్​లో పేర్కొంది. రేపటి సమావేశంలో కేంద్ర హోం, ఆర్థిక, ఆరోగ్య శాఖల మంత్రులు కూడా హాజరు కానున్నట్లు సమాచారం. అయితే ఐదో సారి జరగనున్న ఈ వీసీలో అన్ని రాష్ట్రాల ముఖ్యమంత్రులు మాట్లాడేందుకు అవకాశం ఇవ్వనున్నట్లు సమాచారం.