అదిరిందయ్యా మరియప్పన్​.. మెప్పిస్తోంది 'లైబ్రరీ సెలూన్​'!

తమిళనాడులో సెలూన్​నే లైబ్రరీగా మార్చాడో పుస్తక ప్రియుడు. తాను చడవడమే  కాదు, తన దుకాణానికి వచ్చిన వారూ తప్పకుండా చదవాలని పట్టుబట్టాడు. ఆఖరికి కస్టమర్లమందరూ పుస్తక పఠనంలోని మాధుర్యాన్ని చవి చూసేలా చేశాడు. ఎలా అంటారా... అయితే, ఈ కథనం చదవాల్సిందే!

తమిళనాడు తూత్తుకుడిలో ఓ క్షౌరశాల గ్రంథాలయాన్ని తలపిస్తోంది. ఈ కాలం యువకులకు పుస్తక పఠనం అలవాటు చేయాలన్న ఏకైక లక్ష్యంతో తన దుకాణాన్నే లైబ్రరీగా మార్చేశాడు పొన్​​ మరియప్పన్.

కేశాల బాహ్య సౌందర్యాన్ని అందంగా తీర్చిదిద్దడమే కాదు, మెదడుకు కాస్త మేత కూడా పెట్టాలని నిర్ణయించుకున్నాడు మరియప్పన్​. అందుకే, 200కు పైగా పుస్తకాలు తన దుకాణంలో ఏర్పాటు చేసి, 'లైబ్రరీ సెలూన్'​ను సృష్టించాడు.

తన వినూత్న ఆలోచనకు సర్వత్రా ప్రశంసలు వెల్లువెత్తుతున్నాయి. పార్లమెంట్ సభ్యురాలు కనిమొళి సైతం మరియప్పన్​ దుకాణాన్ని సందర్శించి, అతని సేవలను ప్రశంసించారు.

"ఇక్కడికి క్షౌరానికి వచ్చే విద్యార్థులు కాసేపు నా లైబ్రరీ నుంచి పుస్తకాలు తీసి చదువుతారు. కొందరు చదవరు. కానీ, అందరూ చదవాలని నేను కోరుకున్నాను. అందుకే, 2020 జనవరి నుంచి ఒకరి సాధారణ క్షౌరానికి రూ.80 ధర ఖరారు చేశాను. అదీ ఎక్కువ అనిపిస్తే రూ. 50కి కూడా క్షౌరం చేయించుకోవచ్చు. ఎందుకంటే, నా షాపుకు వచ్చేవారు'చదవడం అనే కళ'ను నేర్చుకోవడమే నాకు ముఖ్యం."

-మరియప్పన్, సెలూన్​ నిర్వహకుడు​

ఇక వినియోగదారులు మొదట విముఖత చూపినా.. మరియప్పన్​సంకల్పానికి తలవంచక తప్పలేదు. ఇప్పుడు క్షౌరానికి వచ్చే ప్రతి కస్టమర్​ పుస్తక పఠనంలోని మాధుర్యాన్ని ఆస్వాదిస్తున్నారు.

"ఇక్కడికి వచ్చే చాలా మంది కుర్రాళ్లు తమ మొబైళ్లకే అతుక్కుపోయి సమయం వృథా చేస్తారు. కానీ మరియప్పన్ అన్న ఈ లైబ్రరీ పెట్టినప్పటి నుంచి కాస్త పుస్తకాలు తీసి చదువుతున్నారు. కానీ, యువత అంత ఇష్టంగా చదవడంలేదు. అలాంటి వారికి ఆసక్తి పెంచేందుకు ఆయన ఓ రిజిస్టర్​ ఏర్పాటు చేసి, వారికి లాటరీ ద్వారా బహుమతులు అందిస్తున్నాడు. అన్న ప్రతి వినియోగదారుడ్ని పాఠకుడిగా తీర్చిదిద్దాడు."

-వినియోగదారుడు

ఇదీ చదవండి:ఫోన్​ మాట్లాడుతూ భవనం పైనుంచి పడి మహిళ మృతి