'ట్రంప్​.. కశ్మీర్​పై మీ సాయం అవసరం లేదు'

కశ్మీర్​ సమస్యపై మధ్యవర్తిత్వం అవసరం లేదని భారత్​ పునరుద్ఘాటించింది. ఇది భారత్​-పాకిస్థాన్​ ద్వైపాక్షిక అంశమని మరోసారి స్పష్టం చేసింది. అమెరికా అధ్యక్షుడు డొనాల్డ్ ట్రంప్​​ చేసిన 'సాయం' వ్యాఖ్యల నేపథ్యంలో భారత్ ఈ విధంగా స్పందించింది.

కశ్మీర్​ సమస్య పరిష్కారానికి సాయం చేస్తామన్న అమెరికా అధ్యక్షుడు డొనాల్డ్​ ట్రంప్​ వ్యాఖ్యలపై భారత్​ తీవ్ర అభ్యంతరం వ్యక్తం చేసింది. కశ్మీర్​ సమస్యపై మధ్యవర్తిత్వం జరిగే ప్రసక్తే లేదని తేల్చి చెప్పింది.

ప్రపంచ ఆర్థిక వేదిక వార్షిక సమావేశంలో భాగంగా పాకిస్థాన్​ అధ్యక్షుడు ఇమ్రాన్​ఖాన్​తో భేటీ అయ్యారు ట్రంప్​. అనంతరం కశ్మీర్​ అంశంలో 'సాయం' చేయడానికి సిద్ధమని వ్యాఖ్యానించారు. భారత్​-పాకిస్థాన్​లోని పరిస్థితులను నిశితంగా పరిశీలిస్తున్నట్టు పేర్కొన్నారు.

ఎన్నిసార్లు చెప్పినా...

అయితే కశ్మీర్​ అంశం... భారత్​-పాకిస్థాన్​ ద్వైపాక్షిక సమస్య అని అనేక సందర్భాల్లో భారత్​ స్పష్టం చేసింది. మూడో వ్యక్తి జోక్యం, మధ్యవర్తిత్వం అనవసరమని తెలిపింది.

అధికరణ-​ 370 రద్దు అనంతరం ట్రంప్​ చేసిన మధ్యవర్తిత్వం వ్యాఖ్యలు సంచలనం సృష్టించాయి. సమస్య పరిష్కారానికి అమెరికా సాయం తీసుకోవడానికి దాయాది దేశం ​ సిద్ధంగా ఉన్నప్పటికీ... ట్రంప్​ వ్యాఖ్యలను భారత్​ తీవ్రంగా ప్రతిఘటించింది. ఈ నేపథ్యంలో ట్రంప్​ తన వ్యాఖ్యలను ఉపసంహరించుకున్నారు. అయితే.. తాజాగా స్విట్జర్లాండ్​ దావోస్​ సదస్సు వేదికగా మరోసారి అలాంటి వ్యాఖ్యలే చేశారు డొనాల్డ్​.