తేయాకు కార్మికులకు ఛాయ్​వాలా వరాలు

అసోంలోని ఆరు సామాజిక వర్గాలకు 'షెడ్యూల్డ్​ తెగ' హోదాను తిరిగి కల్పిస్తామని ప్రధాని నరేంద్రమోదీ హామీ ఇచ్చారు. ఈశాన్య రాష్ట్రాల్లో పర్యటిస్తున్న మోదీ.. మోరాన్​ బహిరంగ సభలో మాట్లాడారు.

"ఒక ఛాయ్​వాలా బాధను మరో ఛాయ్​వాలానే అర్థం చేసుకోగలడు" అంటూ అసోం ప్రజల్లో జోష్​ నింపారు ప్రధాని నరేంద్రమోదీ. ఎన్నికల ప్రచారంలో భాగంగా ఈశాన్య రాష్ట్రాల్లో సుడిగాలి పర్యటన చేస్తున్నారు మోదీ. అసోం, పశ్చిమ్ బంగాలో తేయాకు కార్మికుల పరిస్థితి మెరుగుపరుస్తానని ప్రధాని హామీ ఇచ్చారు.

"స్వాతంత్ర్యం వచ్చిన ఇన్నేళ్లలో అసోంలోని 40శాతం ఇళ్లకే విద్యుత్​ వచ్చింది. అదే మా హయాంలో ప్రతి ఇంటికీ కరెంట్​ వచ్చింది. మోదీ ప్రభుత్వంతో ప్రజలు సంతోషంగా ఉన్నారు. దేశమంతా బాగానే ఉంది. వాళ్లు (కాంగ్రెస్​, ఉగ్రవాదులు) మాత్రం బాధపడుతున్నారు. అసోం అకార్డ్​లోని ఆరు సామాజిక వర్గాలు... అహోం, మోటాక్, మోర్నర్, సుతీయా, కోజ్​ రాజవంశీయులు, టీ తెగలకు ఎస్టీ హోదా ప్రకటించేందుకు కృషి చేస్తున్నాం."
-నరేంద్ర మోదీ, ప్రధాన మంత్రి

అసోం అభివృద్ధి కోసం చేసిన పనులను ప్రజలకు వివరించారు మోదీ.

• 5 లక్షల మందికి ఇళ్లు కట్టించాం. 25 లక్షల మంది ఆరోగ్య బీమా పొందారు.
• తేయాకు తోటల కార్మికులకు రెండు విడతల్లో రూ. 5వేల సహాయం అందించాం.
• తేయాకు బెల్టులోని 4 లక్షల కార్మికులకు బియ్యం, రెండు కిలోల చక్కెర ఉచితంగా ఇవ్వాలని నిర్ణయించాం.

ఇదీ చూడండి:రైల్వే టీ కప్పులపై 'చౌకీదార్'​ రగడ