నేడు అమేఠీకి మోదీ

లోక్​సభ ఎన్నికలు సమీపిస్తున్న తరుణంలో ఉత్తరప్రదేశ్​లో నేడు పర్యటించనున్నారు మోదీ. రాహుల్​ గాంధీ నియోజకవర్గమైన అమేఠీలో జరిగే బహిరంగ సభలో ప్రసంగించనున్నారు.

రాహుల్​ గాంధీ నియోజకవర్గమైన ఉత్తరప్రదేశ్​లోని అమేఠీలో నేడు ప్రధాని నరేంద్ర మోదీ పర్యటించనున్నారు. ముందుగా గౌరీగంజ్​లో జరిగే బహిరంగ సభలో ప్రసంగిస్తారు. అనంతరం మున్షిగంజ్​ ఆయుధ తయారీ కర్మాగారానికి శంకుస్థాపన చేయనున్నారు. పలు అభివృద్ధి పనులను ప్రారంభించనున్నారు.

కాంగ్రెస్​ అధ్యక్షుడు ప్రాతినిధ్యం వహిస్తున్న అమేఠీలో ప్రధాని మోదీ పర్యటించడం 2014 తర్వాత ఇదే మొదటిసారి. యూపీఏ ఛైర్​పర్సన్ సోనియా గాంధీ ప్రాతినిధ్యం వహిస్తున్న రాయ్​బరేలీలో మాత్రం గత డిసెంబర్​లో మోదీ పర్యటించారు. గాంధీ-నెహ్రూ కుటుంబానికి కంచుకోట అయిన అమేఠీలో మోదీ పర్యటన భాజపా కార్యకర్తల్లో నూతన ఉత్సాహాన్ని నింపుతుందని ఆశిస్తున్నారు.

2014లో..

2014 సార్వత్రిక ఎన్నికల్లో అమేఠీలో రాహుల్​ గాంధీపై భాజపా అభ్యర్థిగా స్మృతీ ఇరానీ పోటీ చేశారు. ఆమెకు మద్దతుగా అమేఠీ లోక్​సభ నియోజకవర్గంలో మే 5న మోదీ ఎన్నికల ప్రచారం చేశారు. ఆ ఎన్నికల్లో స్మృతి ఓడినా... సుమారు 3 లక్షల ఓట్లు సాధించారు.

భాజపా ఆశలు

2017 ఉత్తరప్రదేశ్​ అసెంబ్లీ ఎన్నికల్లో అమేఠీ పరిధిలోని ఐదు స్థానాల్లో భాజపా 4 స్థానాలను కైవసం చేసుకుంది. ఎస్పీ 1 స్థానంలో గెలుపొందింది. కాంగ్రెస్​ కనీసం ఖాతా తెరవలేకపోయింది. ఈ ఫలితాలు భాజపా శ్రేణుల్లో నూతనోత్సాహం నింపాయి.

ఈ నేపథ్యంలో రాబోయే సార్వత్రిక ఎన్నికల్లో మరలా ఇదే నియోజకవర్గం నుంచి పోటీ చేయాలని స్మృతీ ఇరానీ భావిస్తున్నారు. ప్రస్తుతం మోదీ అమేఠీ పర్యటన పార్టీ కార్యకర్తల్లో ఉత్సాహం నింపుతుందని భాజపా ఆశిస్తోంది.