సెల్ఫీ కోసం స్తంభాలు కూల్చి జైలుకెళ్లాడు!

సెల్ఫీల కోసం సాహసాలు చేసి ప్రాణాల మీదకు తెచ్చుకున్న ఘటనలు ఎన్నో చూశాం. కర్ణాటకలోనూ అలాంటిదే జరిగింది. అయితే... ముప్పు వాటిల్లింది వ్యక్తులకు కాదు... ప్రపంచ వారసత్వ సంపదకు. ఫలితంగా ఆ సెల్ఫీ వీరుడు ఇప్పుడు జైల్లో ఊచలు లెక్కపెడుతున్నాడు.

హంపి... కర్ణాటకలోని చారిత్రక నగరం. విజయనగర సామ్రాజ్య కళా, సాహితీ సౌరభాన్ని కళ్లకుగట్టే నిలయం. అందుకే ప్రపంచ వారసత్వ ప్రదేశంగా గుర్తించింది యునెస్కో. అంతటి విశిష్టత ఉన్న చోటుకు... ఒక వ్యక్తి సెల్ఫీ సరదా కారణంగా నష్టం జరిగింది.

జరిగిందిలా...

హంపిలోని పురాతన కట్టడాలను తిలకించేందుకు బెంగళూరు నుంచి వచ్చాడు నాగరాజు(45). అక్కడి అందాలకు ముగ్ధుడై వాటితో సెల్ఫీలు దిగే పనిలో నిమగ్నమయ్యాడు. పురాతన కట్టడాలపై చేయి వేసి ఫొటోలు దిగుతుండగా... 2 స్తంభాలు అకస్మాతుగా కూలిపోయాయి.

వెంటనే స్థానిక పోలీసులు నాగరాజును అరెస్టు చేశారు. 1958నాటి పురాతన స్మారక చిహ్నాలు, పురావస్తు ప్రదేశాలు, అవశేషాల చట్టం కింద కేసులు నమోదు చేశారు. న్యాయస్థానం అతడిని 15 రోజుల జుడీషియల్​ కస్టడీకి పంపింది.

ఇదీ చూడండి : 'విక్రమ్​తో కమ్యూనికేషన్​ పునరుద్ధరించలేకపోయాం'