రజనీ​తో రాజకీయ మైత్రిపై కమల్​ కొత్త పలుకు

తమిళ సూపర్​ స్టార్ రజనీకాంత్​తో రాజకీయంగా కలిసి పనిచేయడానికి తాను సిద్ధమేనని ప్రకటించారు అగ్రకథానాయకుడు కమల్​హాసన్. అయితే రజనీ పేర్కొన్నట్లుగా తమిళనాడు సంక్షేమం కోసం అవసరమైతేనే తమ రాజకీయ మైత్రి ఉంటుందని స్పష్టం చేశారు.

సూపర్​స్టార్ రజనీకాంత్​తో రాజకీయాల్లో కలసి పనిచేయడంపై మరింత స్పష్టత ఇచ్చారు మక్కల్ నీది మయ్యమ్ పార్టీ వ్యవస్థాపకుడు కమల్​ హాసన్. తమిళ ప్రజల సంక్షేమం కోసం అవసరమని భావిస్తేనే ఈ రాజకీయ మైత్రి ఉంటుందని వ్యాఖ్యానించారు.

"నేను, మిత్రుడు రజనీకాంత్ ఒకే అభిప్రాయంతో ఉన్నాం. తమిళనాడు కోసం అవసరమైతే కలసి పనిచేసేందుకు మేం సిద్ధం. కేవలం రాజకీయాల కోసమే ఈ రంగంలోకి అడుగుపెట్టలేదు. తమిళనాడు అభివృద్ధే మా లక్ష్యం. ఆయన చెప్పింది జాగ్రత్తగా పరిశీలిస్తే అవసరమైతే కలిసి పనిచేస్తామన్నారు. అవును.. తమిళనాడు కోసం అవసరమైతే కలసి పనిచేస్తాం."

-కమల్​ హాసన్, మక్కల్​ నీది మయ్యమ్​ అధినేత

తమ స్నేహం కంటే తమిళనాడు సంక్షేమమే ముఖ్యమని ఉద్ఘాటించారు లోకనాయకుడు. అయితే ఇద్దరు అగ్రనటుల మధ్య రాజకీయ పొత్తు ఎప్పటికి కుదరొచ్చన్న అంశంపై కమల్ స్పష్టత ఇవ్వలేదు.

రజనీ ఎంఎన్​ఎమ్​ పార్టీలో చేరతారా అని ఓ పాత్రికేయుడు అడగ్గా కమల్​ అసహనం వ్యక్తంచేశారు. ఇలాంటి ప్రశ్నలు అడగడం తగదని హితవు పలికారు.

కొత్త ప్రయాణం...

కమల్​హాసన్ గతేడాదే మక్కల్​ నీది మయ్యమ్ పార్టీని స్థాపించారు. 2021లో జరిగే ఎన్నికల్లో పోటీ చేసేందుకు రజనీకాంత్ నూతన రాజకీయ పార్టీ పెడతానని ప్రకటించారు.

తమిళనాడు సంక్షేమం కోసం రజనీకాంత్​తో కలిసి పనిచేస్తానని మంగళవారం కమల్​ అనగా... కాసేపటికే సానుకూలంగా స్పందించారు సూపర్​స్టార్.

ఇదీ చూడండి: రాజకీయ 'మైత్రి'కి రజనీ-కమల్​ సిద్ధం!