కాంగ్రెస్పై అమిత్ షా ధ్వజం మిషన్ శక్తి విజయంపై కాంగ్రెస్ స్పందించిన తీరును తప్పుబట్టారు భాజపా అధ్యక్షుడు అమిత్ షా. శాస్త్రవేత్తల విజయాలు, సైనికుల త్యాగాలు కాంగ్రెస్ అధ్యక్షుడు రాహుల్ గాంధీకి నాటకాలుగా కనిపిస్తున్నాయని మండిపడ్డారు. ప్రయోగం విజయవంతమైందని ప్రధాని నరేంద్రమోదీ ప్రకటించిన అనంతరం డీఆర్డీఓ శాస్త్రవేత్తలను ట్విట్టర్లో రాహుల్ అభినందించారు. అదే సమయంలో "మోదీకి ప్రపంచ నాటక దినోత్సవ శుభాకాంక్షలు" అని విమర్శించారు రాహుల్.
ఈ వ్యాఖ్యలకు స్పందిస్తూ కాంగ్రెస్పై నిప్పులు చెరిగారు అమిత్ షా.
"అంతరిక్షంలోని ఉపగ్రహాన్ని ధ్వంసం చేసే క్షిపణిని విజయవంతంగా ప్రయోగించాం. కానీ ఈ విషయం భూమిపై ఉన్న కొందరిని బాధించింది. సైనికులను అవమానించటం అలవాటుగా మారిన విపక్షాలు.. శాస్త్రవేత్తలనూ విమర్శించటం చాలా బాధాకరం."
-అమిత్ షా, భాజపా జాతీయాధ్యక్షుడు
జాతీయ భద్రతలో మిషన్ శక్తి అతి పెద్ద ఘట్టమని కొనియాడారు అమిత్ షా. ప్రయోగం విజయవంతంపై మోదీని అభినందించారు.
"ఇది భారతీయులందరికీ గర్వకారణమైన సందర్భం. మిషన్లో భాగమైన శాస్త్రవేత్తలకు శుభాకాంక్షలు. ప్రజల భద్రత, ఆసక్తికి అనుగుణంగా పని చేస్తున్న ప్రధాని నరేంద్రమోదీకి కృతజ్ఞతలు."
-అమిత్ షా, భాజపా జాతీయాధ్యక్షుడు
ఆర్ఎస్ఎస్ అభినందనలు
మిషన్ శక్తి విజయవంతంపై రాష్ట్రీయ స్వయంసేవక్ సంఘ్ ప్రశంసలు కురిపించింది. శాస్త్రవేత్తలు, ప్రభుత్వానికి అభినందనలు తెలిపింది.
"మిషన్ శక్తి ప్రయోగం విజయంతో అంతరిక్షంలో భారత్ బలమైన శక్తిగా మారింది. శాటిలైట్ను ధ్వంసం చేసే ఏశాట్ క్షిపణి విజయవంతంగా ప్రయోగించిన శాస్త్రవేత్తలకు శుభాకాంక్షలు. ప్రయోగాన్ని ముందుకు నడిపిన కేంద్ర ప్రభుత్వానికి భారత ప్రజల తరఫున అభినందనలు."
-రాష్ట్రీయ స్వయం సేవక్ సంఘ్
భారత శాస్త్రవేత్తలు అంతరిక్షంలో నిర్వహించిన 'మిషన్ శక్తి' ప్రయోగం విజయవంతమైందని బుధవారం ప్రకటించారు ప్రధాని నరేంద్ర మోదీ. దేశ భద్రతలో మరో మైలురాయి సాధించామని తెలిపారు.
ఇవీ చూడండి:
