కశ్మీర్​ అంశంపై పాక్ ప్రధాని అక్కసు

పాకిస్థాన్ ప్రధాని భారత్​పై మరో సారి పెదవి విరిచారు. జమ్ముకశ్మీర్ విభజన, హోదా రద్దుపై ప్రపంచ వేదికలో తాను గళమెత్తుతానని ప్రతిజ్ఞ చేశారు. పాక్​ స్వాతంత్ర్య దినోత్సవం సందర్భంగా పాక్ ఆక్రమిత కశ్మీర్​లో జరిగిన కార్యక్రమంలో ఈ వ్యాఖ్యలు చేశారు.

జమ్ముకశ్మీర్ విషయంలో పాక్ ప్రధాని ఇమ్రాన్ ఖాన్ మరో సారి తన అక్కసు వెళ్లగక్కారు. ఐక్య రాజ్య సమితి సహా ప్రపంచ వేదికలన్నింటిపై కశ్మీర్ తరపున తన గొంతుకను వినిపిస్తానని పేర్కొన్నారు. ఈ అంశంపై ప్రపంచ దేశాలు స్పందించకపోవడం పట్ల ఆయన అసహనం వ్యక్తం చేశారు. ఒక వేళ భారత్​-పాక్​ల మధ్య యుద్ధం వస్తే దానికి అంతర్జాతీయ సమాఖ్యలే బాధ్యత వహించాలన్నారు.

పాక్‌ స్వాతంత్ర్య దినోత్సవం సందర్భంగా పాక్‌ ఆక్రమిత కశ్మీర్‌లోని ముజఫరాబాద్‌ అసెంబ్లీలో నిర్వహించిన ప్రత్యేక కార్యక్రమంలో ఇమ్రాన్‌ ప్రసంగించారు. ఈ సందర్భంగా కశ్మీర్​ అంశాన్ని లేవనెత్తిన ఇమ్రాన్ ఈ వ్యాఖ్యలు చేశారు.

కశ్మీర్​కు ప్రత్యేక హోదా రద్దు, కేంద్ర పాలిత ప్రాంతాలుగా విభజన.. భారత్‌ చేసిన వ్యూహాత్మక తప్పిదమని ఆరోపించారు ఇమ్రాన్​. ఇందుకు మోదీ, భాజపా మూల్యం చెల్లించక తప్పదన్నారు. కశ్మీర్‌ అంశాన్ని వారు అంతర్జాతీయం చేయడమే ఇందుకు కారణమన్నారు ఇమ్రాన్‌ .

ఒకవేళ తమ దేశం జోలికి భారత్‌ వస్తే అందుకు తగిన విధంగా సమాధానమిస్తామని ఇమ్రాన్‌ హెచ్చరించారు. అందుకు తమ సైనిక బలగం మొత్తం వినియోగిస్తామని చెప్పారు. తమపై దాడికి ఇప్పటికే భారత్‌ ప్రణాళిక రచించిందని ఆరోపించారు.

ఇదీ చూడండి: కశ్మీర్​కు ఈ పంద్రాగస్టు ఎంతో ప్రత్యేకం!