జమ్ము కశ్మీర్​ ఎన్నికలపై భాజపా కసరత్తు!

ఎన్నో నెలలుగా రాష్ట్రపతి పాలనలో ఉంటున్న జమ్ముకశ్మీర్​కు త్వరలోనే ఎన్నికలు జరగనున్నాయన్న ఊహాగానాలు జోరందుకున్నాయి. ఈ నేపథ్యంలో ఎన్నికల కసరత్తును ప్రారంభించింది భాజపా. ఇందులో భాగంగా జమ్ముకశ్మీర్​కు చెందిన కమల నేతలతో పార్టీ అగ్రనేతలు నేడు భేటీకానున్నారు. ఎన్నికల వ్యూహరచనలు, రాష్ట్రంలో భద్రతపై చర్చించనున్నారు.

జమ్ముకశ్మీర్​లో ఎన్నికలు జరగనున్నాయన్న ఊహాగానాల నేపథ్యంలో నేడు భాజపా అగ్రనేతలు... ఆ రాష్ట్ర కమల నేతలతో సమావేశంకానున్నారు. నిత్యం ఉద్రిక్త పరిస్థితులతో వార్తల్లో నిలిచే జమ్ముకశ్మీర్​లో అక్టోబరు నెలలో ఎన్నికలు జరిగే అవకాశాలున్నట్టు సమాచారం. అమర్​నాథ్​ యాత్ర ముగిసిన అనంతరం ఈసీ.. ఎన్నికల షెడ్యూల్​ను ప్రకటించే అవకాశముంది.

ఎన్నికల కోసం వ్యూహరచనలు...

రాష్ట్రంలో భద్రతా పరిణామాలు, ఎన్నికల వ్యూహరచలపై కాషాయ దళ నేతలు చర్చించనున్నారు.

భాజపా కార్యనిర్వాహక అధ్యక్షుడు జే.పీ. నడ్డా ఆధ్వర్యంలో సమావేశం జరగనుంది. ఈ భేటీలో కేంద్ర మంత్రి జితేంద్ర సింగ్​, పార్టీ ప్రధాన కార్యదర్శి రాం​ మాధవ్​, భాజపా రాష్ట్ర అధ్యక్షుడు రవీందర్​ రైనా సహా పలువురు సీనియర్​ నేతలు పాల్గొంటారని సమాచారం.

పార్టీ కార్యనిర్వాహక అధ్యక్షుడు నడ్డా... త్వరలోనే జమ్ముకశ్మీర్​లో పర్యటించే అవకాశాలున్నాయి. పార్టీ కార్యకర్తల్లో ఉత్తేజం నింపి... ఎన్నికల కసరత్తును పర్యవేక్షించనున్నారు.

ఇంకా రాష్ట్రపతి పాలనలోనే...

జూన్​ 2018లో భాజపా- పీడీపీ ప్రభుత్వం కూలిపోయింది. అనంతరం కశ్మీర్​లో రాష్ట్రపతి పాలన విధించారు. ఇంతకు ముందు విధించిన రాష్ట్రపతి పాలన గడువు ఇటీవలె ముగిసింది. మరో ఆరు నెలల పాటు పొడిగిస్తూ జులై 3న నిర్ణయం తీసుకుంది పార్లమెంట్​.

ఇదీ చూడండి:- పాక్​లో 72 ఏళ్ల తర్వాత తెరుచుకున్న హిందూ ఆలయం