నిజాముద్దీన్​ ప్రార్థనల్లో పాల్గొన్న విదేశీయుల వీసాలు రద్దు

దిల్లీలోని నిజాముద్దీన్ మర్కజ్​ తబ్లీగీ జమాత్​ ప్రార్థనల్లో పాల్గొన్న విదేశీయుల వీసాలను రద్దు చేసింది కేంద్రం. 960 మంది పాస్​పోర్టులను బ్లాక్​లిస్టులో పెట్టింది. వారందరిపై చట్టపరమైన చర్యలు తీసుకోవాలని రాష్ట్ర ప్రభుత్వాలను కోరింది.

దేశ రాజధాని నగరంలోని తబ్లీగీ జమాత్‌ కార్యక్రమానికి హాజరైన విదేశీయుల వీసాలను కేంద్రం రద్దు చేసింది. నిజాముద్దీన్‌ మర్కజ్‌ కార్యక్రమానికి హాజరైన 960 మంది పాస్‌పోర్టులను కేంద్ర హోంమంత్రిత్వశాఖ బ్లాక్‌లిస్ట్‌లో పెట్టింది. ఈ విషయాన్ని ట్విట్టర్​ ద్వారా వెల్లడించింది. పర్యటక వీసాలపై వచ్చిన వీరంతా తబ్లీగీ జమాత్‌ కార్యకలాపాల్లో పాల్గొన్నట్టు గుర్తించిన కేంద్రం.. వారిపై చట్టపరమైన చర్యలు తీసుకోవాలని రాష్ట్రాలను ఆదేశించింది.

కేంద్ర హోంశాఖ ట్వీట్​

మొత్తం 1300 మంది

1300 మందికి పైనే విదేశీయులు జమాత్​ ప్రార్థనల్లో పాల్గొన్నట్లు ఇదివరకే వెల్లడించారు అధికారులు. వీరిలో అమెరికా, ఫ్రాన్స్​, ఇటలీ దేశాల నుంచి వచ్చినవారున్నట్లు స్పష్టం చేశారు. అత్యధికంగా దిల్లీలోనే 250 మంది ఉండగా.. ఎక్కువశాతం మంది నిజాముద్దీన్​ మర్కజ్​ ప్రాంతంలోనే ఉన్నట్లు అధికారులు గుర్తించారు. దేశ రాజధానిలోని 250 మంది విదేశీయుల్లో ఇద్దరు అమెరికన్లు, ఇండోనేషియా-172, కిర్గిస్థాన్​-36, బంగ్లాదేశ్​-21, మలేసియా-12, అల్జీరియా-7, అఫ్గానిస్థాన్​-2, ఫ్రాన్స్​, బెల్జియం, ఇటలీ, తునీసియా నుంచి ఒక్కో దేశస్థుడు ఉన్నాడు.

ఆంధ్రాలో-24, తెలంగాణలో-96

దిల్లీ తర్వాత ఉత్తర్​ప్రదేశ్​లో 247 మంది విదేశీయులుండగా.. మహారాష్ట్ర-154, తమిళనాడు-133, తెలంగాణ-96, హరియాణా-86, బంగాల్​-70, మధ్యప్రదేశ్​-59, ఝార్ఖండ్​-38, ఆంధ్రప్రదేశ్​-24, ఉత్తరాఖండ్​-12, ఒడిశా-7, రాజస్థాన్​లో అయిదుగురు ఉన్నారు.

కర్ణాటకలో 24 మంది పంజాబ్​లో ముగ్గురు ఉన్నట్లు కూడా అధికారులు గుర్తించారు. అయితే వారందరూ లాక్​డౌన్​ కంటే ముందే దేశాన్ని విడిచి వెళ్లినట్లు స్పష్టం చేశారు.

ఇప్పటివరకు నిజాముద్దీన్​ మర్కజ్​ ప్రార్థనల్లో పాల్గొన్న 12 మంది మృతి చెందగా, 245 కేసులు నమోదయ్యాయి. అయితే దేశవ్యాప్తంగా తబ్లీగీ జమాత్​ సభ్యులతో పాటు వారితో కలిసి మెలిగినవారిని దాదాపు 9000 మందికిపైగా క్వారంటైన్​కు తరలిస్తున్నారు.