బాల్యవివాహాలను అరికట్టేందుకు అసోం ప్రభుత్వం రాష్ట్రవ్యాప్తంగా అణిచివేత చర్యలు చేపడుతోంది. బాల్య వివాహానికి హాజరయ్యాడనే కారణంతో బొంగైగావ్ జిల్లాకు చెందిన ఓ వ్యక్తిని పోలీసులు అరెస్ట్ చేశారు. పెళ్లికి వెళ్లినందుకు సాక్షిగా ఆరోపిస్తూ ఓ వ్యక్తిని అరెస్ట్ చేయడం ఇదే మొదటిసారి కావడం విశేషం. అయితే అసోం పోలీసులు బాల్య వివాహాలకు సంబంధించిన కేసుల్లో ఇప్పటివరకు 2,666 మందిని అరెస్ట్ చేశారు. అసోం ముఖ్యమంత్రి హిమంత బిశ్మ శర్మ కూడా ఈ సాంఘిక దురాచారాన్ని రూపుమాపడానికి ప్రజలు మద్దతుగా నిలవాలని కోరుతూ ట్వీట్ చేశారు.
పెళ్లికి వెళ్లాడని ఆ వ్యక్తి అరెస్ట్.. చరిత్రలో మొదటిసారి! - అసోం బాల్య వివాహాల లేటెస్ట్ న్యూస్
వివాహానికి హాజరయ్యాడనే కారణంతో పోలీసులు ఓ వ్యక్తిని అరెస్ట్ చేశారు. రాష్ట్ర వ్యాప్తంగా బాల్య వివాహాలను నివారించే చర్యల్లో భాగంగా ఆ వ్యక్తిని అరెస్ట్ చేసినట్లు అసోం పోలీసులు తెలిపారు.
అసోం పోలీసుల అణిచివేత
"బాల్య వివాహాలకు వ్యతిరేకంగా మా అణిచివేత కొనసాగుతోంది. ఇప్పటివరకు 2,666 మందిని అరెస్ట్ చేశాం. ఈ దురాచారానికి వ్యతిరేకంగా మా డ్రైవ్ కొనసాగిస్తాం. దీనికోసం అసోం ప్రజల మద్దతు కోరుతున్నాం."
-- హిమంత బిశ్వ శర్మ, అసోం ముఖ్యమంత్రి
బొంగైగావ్ జిల్లాలోని సుపరిగురి ప్రాంతానికి చెందిన జహీర్ అలీ మండల్ అనే వ్యక్తి.. తన మేనల్లుడు పెళ్లికి వెళ్లాడనే కారణంతో పోలీసులు అతడిని అరెస్ట్ చేశారు. మండల్ను శుక్రవారం కోర్టులో హాజరుపరుస్తామని తెలిపారు. అసోం ప్రభుత్వం బాల్య వివాహాల బాధితులకు ఆర్థికంగా అండగా ఉండాలని ప్రభుత్వం ఆలోచిస్తోంది. అందుకోసం ముగ్గురు రాష్ట్ర మంత్రులతో కూడిన ఓ కమిటీని కూడా ఏర్పాటు చేసింది. రాష్ట్రంలో దాదాపు 31 శాతం వివాహాలు తక్కువ వయసులోనే జరుగుతున్నట్లు నివేదికలు చెబుతున్నాయి.