రెండు నెలల్లో అమరావతి పనులు ప్రారంభిస్తాం - నారా లోకేశ్ - Nara Lokesh Rachabanda Program

Nara Lokesh Rachabanda Program: రెండు నెలల్లో అమరావతి పనులు ప్రారంభిస్తామని తెలుగుదేశం పార్టీ జాతీయ ప్రధాన కార్యదర్శి నారా లోకేశ్ హామీ ఇచ్చారు.  అధికారంలోకి రాగానే వైసీపీ పెంచిన విద్యుత్ ఛార్జీలు, పన్నుల భారాన్ని తగ్గిస్తామని లోకేశ్ చెప్పారు. మంగళగిరి మండలం బేతపూడి, నవులూరు, తాడేపల్లి మండలం డోలాస్ నగర్​లో నారా లోకేశ్ రచ్చబండ కార్యక్రమం నిర్వహించారు. వైసీపీ హయాంలో ప్రజలు ఎదుర్కొన్న ఇబ్బందులు లోకేశ్ ముందు ఉంచారు. ఒక్క అవకాశం ఇస్తే సీఎం జగన్ తమను కోలుకోలేని దెబ్బ తీశారని ప్రజలు లోకేశ్ ముందు వాపోయారు. భూములిచ్చిన తమను ఐదేళ్లుగా వైసీపీ మంత్రులు హేళనగా మాట్లాడరని కనీసం కౌలు కూడా చెల్లించలేదని రైతులు తెలిపారు. 

తాము అధికారంలోకి రాగానే అమరావతి పనులను ప్రారంభించి, రైతులకు రావాల్సిన బకాయిలను చెల్లిస్తామన్నారు. భూసమీకరణ కింద భూములు ఇవ్వని వారితో చర్చలు జరిపి రాజధాని నిర్మాణానికి ఎలాంటి ఆటంకాలు లేకుండా చేస్తామని లోకేశ్ హామీ ఇచ్చారు. ఎమ్మెల్యే ఆర్కే నటనలో బాలయ్య, పవన్​ను మించి పోయారని నారా లోకేశ్ ఆరోపించారు. ప్రజలకు తప్పుడు హామీలు ఇచ్చి వారిని నట్టేట ముంచారన్నారు. గత ఎన్నికల సమయంలో ప్రజలకు ఇచ్చిన హామీలు ఏమయ్యాయని లోకేశ్ ప్రశ్నించారు.