చేనేత రంగానికి పూర్వ వైభవం తీసుకువస్తాం : మంత్రి తుమ్మల - Padmashali Program in Hyderabad

Minister Tummala On Handloom Sector Telangana : నూతనంగా ఏర్పడిన కాంగ్రెస్ ప్రజా ప్రభుత్వంలో చేనేత రంగానికి పూర్వ వైభవం తీసుకువస్తామని రాష్ట్ర వ్యవసాయ, చేనేత జౌళి శాఖ మంత్రి తుమ్మల నాగేశ్వరరావు తెలిపారు. హైదరాబాద్ నారాయణగూడ పద్మశాలి భవన్​లో జరిగిన తెలంగాణ ప్రాంత పద్మశాలి సంఘం అధ్యక్ష ప్రమాణ స్వీకారోత్సవం కార్యక్రమంలో పాల్గొన్నారు. చేనేత కార్మికుల స్థితిగతులను మెరుగుపరిచేందుకు తనకు ఇచ్చిన అవకాశాన్ని సద్వినియోగం చేసుకుంటానని మంత్రి తుమ్మల అన్నారు. 

Padmashali Program in Hyderabad : గత ప్రభుత్వం నిర్లక్ష్యం కారణంగా వరంగల్, పోచంపల్లి, గద్వాల్ టెక్స్​టైల్ పార్క్​లు అసంపూర్తిగా ఉన్నాయని, వాటిని త్వరితగతిన ప్రారంభిస్తామని మంత్రి తెలిపారు. తనకు ఈ రంగంలో అనుభవం లేదని, అయినప్పటికీ సంబంధిత అధికారులు, అనుభవజ్ఞులైన సంఘం ప్రతినిధుల సూచనలు తీసుకొని చేనేత అభివృద్ధికి కృషి చేస్తానని హామీ ఇచ్చారు. ఈ సందర్భంగా తెలంగాణ ప్రాంత పద్మశాలి సంఘం రాష్ట్ర అధ్యక్షుడిగా కమర్తపు మురళితో మంత్రి తుమ్మల ప్రమాణస్వీకారం చేయించారు. ఈ కార్యక్రమానికి ఎమ్మెల్సీ ఎల్. రమణ, అఖిల భారత పద్మశాలి సంఘం అధ్యక్షుడు కందగట్ల స్వామి, వరంగల్ మహానగర పురపాలక సంఘం మేయర్ గుండు సుధారాణి తదితరులు హాజరయ్యారు.