'లోకల్ ముద్దు, నాన్​లోకల్ వద్దు' - పాయకరావుపేట వైసీపీలో విభేదాలు - వైసీపీలో విభేదాలు

Internal Clashes Between YSRCP Leaders: ఇన్​ఛార్జ్​ల మార్పుతో వైసీపీలో మొదలైన అసమ్మతి రోజురోజుకూ పెరుగుతూనే ఉంది. నియోజకవర్గాలను నిరసనలతో హోరెత్తిస్తున్నారు. తాజాగా అనకాపల్లి జిల్లా పాయకరావుపేట నియోజకవర్గంలో వైసీపీలో విభేదాలు రోడ్డు ఎక్కాయి. ఎమ్మెల్యే కంబాల జోగులు వద్దంటూ ఆ పార్టీ కార్యకర్తలు పలువురు నిరసన చేపట్టారు. ఎమ్మెల్యే గొల్ల బాబురావు స్థానంలో ఇన్​ఛార్జ్​గా విజయనగరం జిల్లా రాజాం ఎమ్మెల్యే కంబాల జోగులను పార్టీ అధిష్ఠానం నియమించింది. 

ఈ నేపథ్యంలో స్థానికులకే టికెట్ కేటాయించాలని లోకల్ ముద్దు, నాన్ లోకల్ వద్దు అంటూ మాల కార్పొరేషన్ ఛైర్మన్ పెదపాటి అమ్మాజీ వర్గీయులు ధర్నా చేశారు. ఎస్ రాయవరం జాతీయ రహదారి కూడలి నుంచి ర్యాలీగా వచ్చి మానవహారంగా ఏర్పడ్డారు. పెదపాటి అమ్మాజీ స్థానికురాలు కావడంతో ఇక్కడ సమస్యలు నేరుగా పరిశీలించేందుకు అవకాశం ఉంటుందని ఆ పార్టీ నాయకులు పలువురు తెలిపారు. దీనిపై అధిష్టానం ఆలోచించి టికెట్ అమ్మాజీ కేటాయించేలా చర్యలు చేపట్టాలని డిమాండ్ చేశారు.