Amazon Prime video:ప్రముఖ వీడియో స్ట్రీమింగ్ ప్లాట్‌ఫామ్‌ అమెజాన్ ప్రైమ్ వీడియో తన యూజర్లకు షాకిచ్చింది. వచ్చే ఏడాది నుంచి డివైజ్ల వాడకంలో పరిమితిని విధించనున్నట్లు ప్రకటించింది. మన దేశంలో ఎక్కువగా వినియోగించే ఓటీటీ ప్లాట్‌ఫామ్‌లలో అమెజాన్‌కు చెందిన ప్రైమ్ వీడియో ఒకటి. ఓటీటీ బెనిఫిట్స్తో పాటు అమెజాన్ ఇ-కామర్స్ సేవలు కూడా అందిస్తున్న విషయం తెలిసిందే.
ప్రైమ్ మెంబర్లు షాపింగ్ చేస్తే కేవలం ఒకరోజులోనే డెలివరీలను అందిస్తుంది. ఇలా ఓటీటీతో పాటు షాపింగ్ ప్రయోజనాలు కూడా లభిస్తుండడంతో చాలామంది దీన్ని వినియోగిస్తుంటారు. అయితే చాలామంది ఒక అకౌంట్‌ తీసుకుని పలువురు ఈ సర్వీసులను పొందుతున్నారు. దీంతో అమెజాన్ ప్రైమ్ వీడియోకు సంబంధించి తన టర్మ్స్‌ను సవరించాలని నిర్ణయించి డివైజ్ల వాడకంపై పరిమితి విధించింది.
ప్రస్తుతం అమెజాన్ ప్రైమ్ వీడియో యూజర్లు ఒకేసారి 5 డివైజ్లను వాడుకోవచ్చు. ఏ డివైజ్ అన్నది సంబంధం లేకుండా వీడియోలను చూడొచ్చు. అయితే అమెజాన్.. డివైజుల సంఖ్యను అలాగే ఉంచి, టీవీల సంఖ్యపై పరిమితి విధించింది. ఒకేసారి రెండు కంటే ఎక్కువ టీవీల్లో అమెజాన్ ప్రైమ్ వీడియోను వాడాల్సివస్తే కొత్త కనెక్షన్‌ తీసుకోవాల్సిందేనని స్పష్టం చేసింది. జనవరి నుంచి ఈ మార్పు అమల్లోకి రానుందని పేర్కొంది.
ఈ మేరకు అమెజాన్ ఇందుకు సంబంధించిన సమాచారంతో యూజర్లకు ఇ-మెయిల్స్‌ పంపించడం ఇప్పటికే ప్రారంభించింది. సెట్టింగ్స్‌ పేజీలోని మేనేజ్‌ ఆప్షన్‌ ద్వారా డివైజులను మేనేజ్‌ చేసుకోవచ్చని కంపెనీ తెలిపింది. ప్రస్తుతం అమెజాన్ వార్షిక మెంబర్షిప్ ధర రూ.1499గా ఉంది. త్రైమాసికానికైతే రూ.599, నెలకైతే రూ.299 చెల్లించాల్సి ఉంటుంది. ఈ మెంబర్షిప్ తీసుకోవడం ద్వారా ఎలాంటి యాడ్స్ లేకుండానే సినిమాలు, వెబ్‌సిరీస్‌లు చూడొచ్చు.