ADAS సిస్టమ్​తో హోండా న్యూ అమేజ్- ఈ ఫీచర్‌తో వచ్చిన దేశంలోనే అత్యంత చౌకైన కారు ఇదే!

అత్యాధునిక ఫీచర్లతో హోండా నయా అమేజ్- అఫర్డబుల్ ధరలోనే లాంఛ్!

New Honda Amaze Launched:జపాన్‌కు చెందిన కార్ల తయారీ సంస్థ హోండా.. కాంపాక్ట్ సెడాన్ హోండా అమేజ్‌లో అప్డేటెడ్ వెర్షన్‌ను భారత మార్కెట్లో లాంఛ్ చేసింది. ఈ అప్డేటెడ్ వెర్షన్ అమేజ్​ను అదిరే డిజైన్‌లో స్టన్నింగ్​ లుక్‌తో తీసుకొచ్చింది. కంపెనీ ఈ కారును రూ.7,99,900 (ఎక్స్-షోరూమ్) ప్రారంభ ధరతో విడుదల చేసింది. ఇందులో మరో ప్రత్యేకత ఏంటంటే హోండా.. ఈ కారులో అధునాతన డ్రైవర్ అసిస్టెన్స్ సిస్టమ్ (ADAS)ను అందించింది. ఈ ADAS ఫీచర్‌తో వచ్చిన దేశంలోనే అత్యంత చౌకైన కారుగా హోండా అమేజ్ గుర్తింపు పొందింది.

వేరియంట్స్: హోండా అమేజ్ మూడు వేరియంట్లలో మార్కెట్లో అందుబాటులో ఉంటుంది.

• V
• VX
• ZX

ఎక్స్​టీరియర్ డిజైన్: ఈ కొత్త అమేజ్ ఫ్రంట్ ఎండ్ కంపెనీ కాంపాక్ట్ SUV, హోండా ఎలివేట్‌ను పోలి ఉంటుంది. ఇది దీర్ఘచతురస్రాకార గ్రిల్, హోండా అకార్డ్ మాదిరిగానే బంపర్ డిజైన్‌తో వస్తుంది. ఈ కారు'హోండా సిటీ' మాదిరిగా మల్టీ-స్పోక్ అల్లాయ్ వీల్స్, ర్యాప్‌రౌండ్ టెయిల్ లైట్లను కూడా కలిగి ఉంది. ఈ కారులో LED DRLలతో కొత్త LED ప్రొజెక్టర్ హెడ్‌ల్యాంప్‌లను అమర్చారు. ఇవి డ్రైవింగ్ చేస్తున్న సమయంలో రోడ్డుపై వస్తున్న వాహనాలను క్లియర్​గా చూసేందుకు సహాయపడతాయి.

New Honda Amaze (Photo Credit- Honda Cars India)

ఇంటీరియర్ డిజైన్:ఈ అప్డేటెడ్ అమేజ్ వెర్షన్ ఇంటీరియర్ డిజైన్.. హోండా సిటీ సెడాన్, ఎలివేట్ SUV మోడల్ మాదిరిగా ఉంటుంది. ఈ కొత్త మోడల్​లో సెమీ-డిజిటల్ డ్రైవర్ డిస్‌ప్లే, 8-అంగుళాల టచ్‌స్క్రీన్‌ ఉంటుంది. అంతేకాక ఇందులో ఎయిర్ కండీషనర్ వెంట్స్ కూడా ఉన్నాయి.

దీని ఇన్స్ట్రుమెంట్ క్లస్టర్‌ కూడా అమేజ్ హోండా సిటీ, ఎలివేట్‌ మాదిరిగానే ఉంటుంది. దీని క్యాబిన్​లో డ్యూయల్-టోన్ కలర్ స్కీమ్ కూడా అందుబాటులో ఉంది. ఇది ఇంటిగ్రేటెడ్ కప్ హోల్డర్‌లతో రియర్ సెంటర్ ఆర్మ్‌రెస్ట్, వెనక AC వెంట్, ముగ్గురు ప్రయాణీకులకు హెడ్‌రెస్ట్ వంటి సౌకర్యవంతమైన ఫీచర్లతో వస్తుంది. దీనిలోని అన్ని సీట్లూ స్టాండర్డ్​గా థ్రీ-పాయింట్ సీట్ బెల్ట్‌లతో వస్తున్నాయి.

New Honda Amaze (Photo Credit- Honda Cars India)

ADAS ఫీచర్లు:ఈ కారులో అత్యంత ప్రత్యేకమైనది ADAS సిస్టమ్. ఈ ADAS సూట్‌లో అడాప్టివ్ క్రూయిజ్ కంట్రోల్, లీడ్ కార్ డిపార్చర్ నోటిఫికేషన్, అటానమస్ ఎమర్జెన్సీ బ్రేకింగ్, లేన్ కీప్ అసిస్ట్, లేన్ డిపార్చర్ వార్నింగ్, ఆటో హై బీమ్ అసిస్ట్, బ్లైండ్ స్పాట్ మానిటరింగ్ వంటి భద్రతా ఫీచర్లు ఉన్నాయి. వీటితో పాటు ఆరు ఎయిర్‌బ్యాగ్‌లు, హిల్ స్టార్ట్ అసిస్ట్ స్టాండర్డ్‌గా వస్తున్నాయి.

Prices of New Honda Amaze Various Variants (Photo Credit- Honda Cars India)

ఇంజిన్:ఈ కొత్త అమేజ్ పాత మోడళ్లలో ఉన్న అదే 1.2-లీటర్, 4-సిలిండర్​తో సాధారణ పెట్రోల్ ఇంజిన్​నే కలిగి ఉంది. ఇది 88.5bhp పవర్, 110Nm పీక్ టార్క్‌ను ఉత్పత్తి చేస్తుంది. ఇది స్టాండర్డ్‌గా 5-స్పీడ్ మ్యాన్యువల్ గేర్‌బాక్స్‌తో కలిసి వస్తుంది. హైయర్ వేరియంట్స్​లో CVT గేర్‌బాక్స్ ఆప్షన్​ ఉంది. దీని మాన్యువల్, CVT గేర్‌బాక్స్ ఆప్షన్స్ వరుసగా 18.65 kmpl, 19.46 kmpl మైలేజీని అందిస్తాయి.

మార్కెట్లో పోటీ:ఈ అప్డేటెడ్ హోండా అమేజ్‌ మార్కెట్లో ప్రధానంగా న్యూ- జనరేషన్ మారుతి సుజుకి డిజైర్​తో పోటీపడుతుంది. మార్కెట్‌లో దీని ఇతర పోటీదారులు హ్యుందాయ్ ఆరా, టాటా టిగోర్.