వయసులోనే కాదు అవినీతి, అక్రమాల్లోనూ 'పెద్దాయనే' - YSRCP LEADERS LAND ENCROACHMENT

YSRCP Leader Land Encroachment in YSR District : వైఎస్సార్​ జిల్లాలో పెద్దవయస్సున్న ప్రజాప్రతినిధి ఆయన రాముడని పేరులో ఉన్నా చేసేవన్నీ రావణాసురుడి పనులు. కొండ, బండ అనే తేడా లేకుండా ప్రకృతి సంపదను కొల్లగొట్టడమే ఆ ప్రజాప్రతినిధి విధి ! ముఖ్యమంత్రి జగన్‌దీ అదే జిల్లాననే ధీమానో ఎవరూ ఏమీ చేయలేరనే ధైర్యమో మండలానికో బినామీని పెట్టి మరీ చేతికి మట్టి అంటకుండా కోట్ల రూపాయలు కొల్లగొట్టారు. వందలాది ఎకరాల అటవీభూముల్ని స్వాహా చేశారు.

YSRCP Leader Land Encroachment in YSR District :పార్టీ అధినేతను ఆదర్శంగా తీసుకున్నారో లేక వైఎస్సార్సీపీలో మిగతా నేతలకంటే తనేం తక్కువా అని అనుకున్నారో కానీ అక్రమాలే ఆశ, శ్వాసగా అధికారం చేపట్టిన నాటి నుంచి కడప జిల్లాలో పెద్ద వయస్సున్న ఆ ప్రజాప్రతినిధి పెద్దఎత్తున ఆక్రమణలకు తెగబడ్డారు. అయిదేళ్ల పదవీకాలంలో సుమారు రెండు వేల ఎకరాలకు పైగా భూములను కబ్జా చేసిన ఈ పెద్దమనిషి గుత్తేదారుల నుంచి వాటాలు, ఇసుక, మట్టి అమ్మకాల ద్వారా వందల కోట్ల రూపాయలు ఆర్జించారు. నియోజకవర్గంలో ఏ పని చేయాలన్నా 10 శాతం కమీషన్‌ ముట్టజెప్పాల్సిందే. కబ్జాలకు తోడు ఇసుక, మట్టి తరలింపులో కమీషన్ల ద్వారా 200 కోట్ల రూపాయలకుపైగా వెనకేసుకున్నారు.

Corruption Irregularities of YSRCP :మైదుకూరు మండలం నంద్యాలంపేట గ్రామంలోని సర్వే నంబరు 507లో ఉన్న భూముల్ని బినామీల పేరిట ఈ ప్రజాప్రతినిధి ఆక్రమించారు. ఈ సర్వే నంబరులో మొత్తం 267.56 ఎకరాలు రిజర్వ్‌ ఫారెస్టుగా రికార్డుల్లో ఉంది. సర్వే నంబరు 506/బిలో 38.94 ఎకరాలూ అటవీ భూమిగానే చూపిస్తోంది. ఈ రెండు సర్వే నంబర్ల పరిధిలో 306.5 ఎకరాల అటవీ భూమి ఉంటే ఇందులో సగభాగంలో ఇప్పటికే మామిడి తోట సాగు చేస్తున్నారు. మిగతా సగం ఆక్రమించుకునే ప్రయత్నాలు జరుగుతున్నాయి. ఆక్రమిత అటవీ భూమిలోని మామిడి తోటకు అధికారులు సూక్ష్మ సేద్య పరికరాలు ఇచ్చేశారు. అదంతా అటవీ భూమి తమకేం సంబంధం లేదంటూ రెవెన్యూ అధికారులు తప్పించుకున్నారు.

అటవీ భూముల ఆక్రమణపై మైదుకూరు నియోజకవర్గ టీడీపీ ఇన్‌ఛార్జి పుట్టా సుధాకర్‌యాదవ్‌ జాతీయ హరిత ట్రైబ్యునల్‌ను ఆశ్రయించారు. విచారణ చేపట్టిన ట్రైబ్యునల్‌ ఆక్రమిత భూమిని స్వాధీనం చేసుకోవాలని జిల్లా కలెక్టర్‌తో పాటు రాష్ట్ర ఉన్నతాధికారులకు ఆదేశాలు జారీ చేసింది. సాధారణంగా ఎన్జీటీ ఆదేశాల్ని రాష్ట్ర ప్రభుత్వాలు తీవ్రంగా పరిగణించి చర్యలు తీసుకుంటాయి. కానీ మైదుకూరు అటవీ భూమి ఆక్రమణ విషయంలోనూ ఎన్జీటీ ఆదేశాలు అమలు కాలేదు.

YSRCP Leader Irregularities : చాపాడు మండలం వెదురూరు వద్ద పెన్నానదిలో ఒక మండలస్థాయి ప్రజాప్రతినిధిని ముందుంచి ఈ ముఖ్యనేత తవ్వకాలు చేయిస్తున్నారు. ఇసుక అక్రమ తవ్వకాలపై టీడీపీ నేత ఒకరు గ్రీన్‌ ట్రైబ్యునల్‌ను ఆశ్రయించగా ఇప్పుడా వివాదం కోర్టులో ఉంది. మరో మండలస్థాయి ప్రజాప్రతినిధి కుందూ నది నుంచి అక్రమ ఇసుక రవాణా ద్వారా కోట్ల రూపాయలు కొల్లగొట్టి ముఖ్యనేతకు వాటాలు ఇస్తున్నారు. దువ్వూరు గుట్ట నుంచి ఎర్రమట్టి అక్రమ తరలింపు ద్వారా భారీ ఎత్తున ఆర్జించారు. ఖాజీపేట మండలం మునిపాక సమీపం నుంచి ఇసుకను భారీగా తరలించారు. అదే మండలం అప్పనపల్లె వద్ద తన అనుచరుల పేరుతో గుట్ట నుంచి మట్టి తవ్వకాలకు అనుమతి పొంది వైయస్‌ఆర్, నంద్యాల జిల్లాల్లో అమ్మి కోట్లు రూపాయలు సంపాదించారు.

చాపాడులో ఎవరైనా లేఅవుట్లు వేస్తే ఈ ప్రజాప్రతినిధికి కప్పం చెల్లించాల్సిందే. మైదుకూరు మండలం నంద్యాలంపేట పరిధిలో 5.19 ఎకరాల్ని ప్రజాప్రతినిధి అనుచరులు ఆక్రమించే ప్రయత్నం చేశారు. కడప నగరం పుట్టంపల్లెలో అయిదెకరాల భూమిని ఫోర్జరీ సంతకాలతో ఆ ప్రజాప్రతినిధి ఆక్రమించుకున్నారు. NH-67 నిర్మాణంలో భాగంగా నంద్యాలంపేటలో 1.47 ఎకరాల ప్రభుత్వ భూమిని తనదని చెప్పి సుమారు కోటి రూపాయల పరిహారాన్ని తన ఖాతాలో వేయించుకునేందుకు ప్రజాప్రతినిధి అనుచరుడొకరు తీవ్రంగా ప్రయత్నించారు. వ్యవహారం వెలుగులోకి రావడంతో ఆ ప్రక్రియను రెవెన్యూ అధికారులు తాత్కాలికంగా నిలిపేశారు.

Land Enchochment in Nandyalampet : ఈ నేతకు నమ్మిన బంటైన మండలస్థాయి ప్రజాప్రతినిధి ప్రభుత్వ భూముల ఆక్రమణ సహా ఎర్ర చందనం స్మగ్లింగ్‌ వరకు దందాలన్నీ చూసుకుంటారు. బ్రహ్మంగారి మఠం సమీపంలో దాదాపు 10కోట్ల రూపాయల విలువైన 2ఎకరాల ప్రభుత్వ భూమి స్వాధీనం చేసుకునేందుకు యత్నించగా గ్రామస్థులు అడ్డుకున్నారు. ఇంకా ఆ భూమి ఈ నేత ఆధీనంలోనే ఉంది. తోట్లపల్లె వద్ద తనకున్న భూమి పక్కనే ఉన్న మరో 70 ఎకరాల్ని ఆక్రమించి బోర్లు వేయించి సాగు చేస్తున్నారు. మల్లేపల్లె- పలుగురాళ్లపల్లె మధ్య సర్వే నంబరు 1938 పరిధిలో 200 ఎకరాల గుట్టను ఆక్రమించి వంద ఎకరాల్లో పండ్ల తోటల పెంపకం చేపట్టారు. ఈ మండల స్థాయి నేత సోదరుడు ఎర్రచందనం అక్రమ రవాణాలో ఆరితేరారు. అతనిపై పీడీ యాక్టు కూడా నమోదు చేసి జైలుకు పంపించారు. కలసపాడు మండలం మామిళ్లపల్లె దగ్గర బైరటీస్‌ తవ్వకాల వద్ద ఈ నేత కారులో నుంచి పేలుడు పదార్థాలను బయటకు తీస్తుండగా.. అవి పేలడంతో తొమ్మిది మంది మృతి చెందారు. ఇలా అవినీతి, అక్రమాల్లోనూ ఈ ప్రజాప్రతినిధి పెద్దాయనే అంటున్నారు వైఎస్సార్​ జిల్లా వాసులు.