పోలీసు యూనిట్ల అడ్డగోలు విభజన - విడదీసిన స్టేషన్ల పరిధిలో హింసాత్మక ఘటనలు - YSRCP Attacks in gannavaram

Violent Incidents With Division of Police Units: ఉమ్మడి కృష్ణా జిల్లాలో పోలీసు యూనిట్లను ఇష్టారీతిన విభజించడం అనేక పరిణామాలకు దారితీసింది. పోలింగ్‌ రోజు ఇది స్పష్టంగా కనిపించింది. విజయవాడ కమిషనరేట్‌ నుంచి విడదీసి కృష్ణా జిల్లాలో విలీనం చేసిన స్టేషన్ల పరిధిలోనే ఎక్కువ గొడవలు జరిగాయి. ఈ తప్పులను సరిదిద్దకపోతే భవిష్యత్తులో మరిన్ని సవాళ్లు ఎదురయ్యే ప్రమాదం ఉంది.

Violent Incidents With Division of Police Units :పార్లమెంటు నియోజకవర్గాల పరిధి ప్రకారం వైఎస్సార్సీపీ ప్రభుత్వం కొత్త జిల్లాలను ఏర్పాటు చేసింది. కృష్ణా జిల్లాను రెండుగా విభజించింది. విజయవాడ నగరానికి సమీపాన ఉండే పెనమలూరు, గన్నవరం సర్కిళ్లను కృష్ణా పోలీసు విభాగంలో విలీనం చేసింది. అసంబద్ధ విభజన ఫలితంగా ఎన్నికల రోజు గన్నవరం, పెనమలూరు నియోజకవర్గాల్లో హింసాత్మక ఘటనలు జరిగాయి.

నియంత్రించని పోలీసులు : 2019 ఎన్నికల్లో గన్నవరం, పెనమలూరు నియోజకవర్గాల్లో హింసాత్మక ఘటనలు లేవు. సమయం మించిపోయినా ఓటింగ్‌కు అనుమతించడంపై ప్రసాదంపాడులోని ఓ బూత్‌లో వివాదం తలెత్తినా ఘర్షణ మాత్రం జరగలేదు. కానీ 2024 ఎన్నికల్లో గన్నవరంలో పెద్దఎత్తున గొడవలు, దాడులు జరిగాయి. 13వ తేదీన పోలింగ్‌ మొదలవగానే తెలుగుదేశం అభ్యర్థి యార్లగడ్డ వెంకట్రావు, వైఎస్సార్సీపీ అభ్యర్థి వల్లభనేని వంశీ బూత్‌ల పరిశీలనకు బయలుదేరారు. ఇద్దరూ దాదాపు ఒకే మార్గంలో ఒకేచోటుకు వెళుతున్నట్లు తెలిసినా పోలీసులు నియంత్రించలేదు. నున్న ప్రాంతంలో మొదలైన కవ్వింపులు తారస్థాయికు చేరి, సూరంపల్లిలో ఇరువర్గాల మధ్య స్వల్ప ఘర్షణకు దారితీసింది. ఆ తర్వాత యార్లగడ్డ వాహనశ్రేణిని అనుసరిస్తూ వంశీ రావడం, ఉంగుటూరు మండలం తేలప్రోలు వద్ద యార్లగడ్డ వాహనాలపై వంశీ అనుచరులు రాళ్ల దాడికి దిగడం చకచకా జరిగిపోయాయి.

సమస్యాత్మక నియోజకవర్గంగా గుర్తించినా సరిపడా పోలీసు బలగాలను కేటాయించలేదు. జిల్లా కేంద్రం 60 కిలోమీటర్ల దూరాన ఉండటంతో అక్కడి నుంచి సిబ్బంది వచ్చేవరకు ఇక్కడున్న పోలీసులు పరిస్థితిని అదుపు చేయలేకపోయారు. ఎన్నికలకు ఏడాదిన్నర ముందు నుంచే గన్నవరంలో ఎమ్మెల్యే వల్లభనేని వంశీ, ఆయన అనుచరులు దౌర్జనాలకు దిగారు. గతేడాది ఫిబ్రవరిలో తెలుగుదేశం కార్యాలయంలో విధ్వంసం సృష్టించారు. ఆ సమయంలోనూ మచిలీపట్నం నుంచి అదనపు బలగాలు రావడానికి చాలా సమయం పట్టింది.

గంజాయి బ్యాచ్‌ అరాచకాలు :ఎన్నికల వేళ పెనమలూరు నియోజకవర్గంలోనూ ఘర్షణలు తలెత్తాయి. పోరంకిలో వైఎస్సార్సీపీ అభ్యర్థి జోగి రమేష్ అనుచరులు రాళ్ల వర్షం కురిపించారు. అలాగే కర్రలు పట్టుకుని వీరంగం చేశారు. ఇంత జరిగినా అక్కడున్న పోలీసులు సమర్థంగా నియంత్రించలేకపోయారు. దూరాన ఉన్న జిల్లా కేంద్రం నుంచి ఎస్పీ, అదనపు సిబ్బంది వచ్చే సరికి జరగాల్సిన నష్టం జరిగిపోయింది. అంతా అయిపోయాక వచ్చిన పోలీసులు హడావుడి చేయడం తప్ప ఒరిగింది శూన్యం.

కొంత కాలంగా పెనమలూరు పోలీసుస్టేషన్‌ పరిధిలో సివిల్‌ పంచాయతీలు, రౌడీషీటర్ల ఆగడాలు, గంజాయి బ్యాచ్‌ అరాచకాలు పెరిగాయి. ఫలితంగా శాంతిభద్రతల సమస్యలు తలెత్తుతున్నాయి. ఇది ఎన్నికలపైనా ప్రభావం చూపించింది. నగరానికి కూతవేటు దూరంలోనే ఉన్న పెనమలూరు ప్రాంతాన్ని కృష్ణాలో విలీనం చేయడంతో ఈ పరిస్థితి తలెత్తింది.

భద్రత పర్యవేక్షణలో లోపం :సాధారణంగా సబర్బన్‌ ప్రాంతాలను కమిషనరేట్‌ పరిధిలోనే ఉంచుతారు. ఆయా ప్రాంతాల్లో నగర జీవనశైలి ఉంటుంది. ఈ ప్రాంతాల్లో వైట్‌కాలర్ నేరాలు, సైబర్ క్రైమ్, ఆర్థిక మోసాల కేసులు ఎక్కువగా నమోదవుతుంటాయి. ఇలాంటి అంశాలను పరిగణనలోకి తీసుకోకుండా పెనమలూరు, గన్నవరం సర్కిళ్లను గ్రామీణ యూనిట్‌లో విలీనం చేయడం వల్ల పోలీసింగ్‌ కుంటుపడింది.

విజయవాడ శివారు స్టేషన్ల పరిధిలో అసాంఘిక కార్యకలాపాలు పెరిగాయి. విజయవాడ నగర బహిష్కరణకు గురైనవారు పెనమలూరు, గన్నవరం, యనమలకుదురు, పోరంకి, ముస్తాబాద, సూరంపల్లి ప్రాంతాల్లో ఉంటూ నేరాలకు పాల్పడుతున్నారు. విమానాశ్రయం కూడా కృష్ణా పోలీసు పరిధిలోకి వెళ్లడంతో ఇక్కడి నుంచి రాకపోకలు సాగించే ప్రముఖుల భద్రత పర్యవేక్షణలో సమన్వయ లోపం తలెత్తుతోంది.