నకిలీ పాస్​పోర్ట్​ల కేసులో కీలక పరిణామం - సీఐడీ అదుపులో ఏఎస్ఐ

Telangana fake Passport Case Update : నకిలీ పత్రాలతో పాస్​పోర్ట్​లు సృష్టించిన కేసులో కీలక పరిణామం చోటుచేసుకుంది. ఈ కేసులో స్పెషల్​ బ్రాంచ్ ఏఎస్ఐ లక్ష్మణ్​ను సీఐడీ అధికారులు అదుపులోకి తీసుకున్నారు.

Telangana fake Passport Case Update : నకిలీ పత్రాలతో పాస్​పోర్ట్​లు సృష్టించిన కేసులో కీలక పరిణామం చోటుచేసుకుంది. ఇప్పటివరకు నకిలీ పత్రాలతో పాస్​పోర్ట్​ జారీకి సహకరించిన స్పెషల్ బ్రాంచ్ ఏఎస్ఐ లక్ష్మణ్​ను సీఐడీ అధికారులు అదుపులోకి తీసుకున్నారు. ఇప్పటివరకు ఈ కేసులో 14 మందిని అరెస్ట్ చేశారు. ఏఎస్​ఐ లక్ష్మణ్ ప్రస్తుతం నిజామాబాద్ పోలీస్ కమిషరేట్ పరిధిలోని నవిపేట్​, మాక్లూర్ పోలీస్ స్టేషన్​లో విధులు నిర్వహిస్తున్నాడు. తదుపరి విచారణ కొరకు సీఐడీ అధికారులు హైదరాబాద్​కు తరలించారు.

ఫేక్ సర్టిఫికేట్లతో విదేశీయులకు భారత పౌరుల పాస్​పోర్టులు (Fake Passports) ఇప్పించి గల్ఫ్ దేశాలకు పంపిస్తున్న ముఠా గురించి తెలిసిన విషయమే. దీనిపై విచారణ ప్రారంభించిన సీఐడీ విభాగం ప్రాథమిక దర్యాప్తులో హైదరాబాద్‌, నిజామాబాద్‌, కరీంనగర్‌, జగిత్యాల, కోరుట్లలో ఈ దందా జరిగినట్లు గుర్తించింది. నకిలీ సర్టిఫికెట్లతో పాస్​పోర్టులను సృష్టించడం ద్వారా 92మందిని భారతీయులుగా దేశం దాటించినట్లు అధికారులు వెల్లడించారు. ఈ కేసులో అబ్దుల్​ సత్తార్​ను ప్రధాన నిందితుడిగా గుర్తించారు.

Telangana Fake Passport Scam Update : విజిటింగ్ వీసాలతో థాయిలాండ్‌, కెనడా, మలేషియా, ఇరాక్, దుబాయ్, స్పెయిన్, ఫ్రాన్స్ వెళ్లినట్లు అధికారులు గుర్తించారు. ఆయా దేశాల్లో భారతీయ పౌరులుగా విదేశీయులు చలామణి అవుతున్నారని పేర్కొంది. జగిత్యాల, ఫలక్‌నుమాలోని చిరునామాలతో ఎక్కువగా పాస్​పోర్టులను తీసుకున్నారని దర్యాప్తులో తేలిందని చెప్పారు.

ఈ కేసులు విచారణ చేస్తున్న సీఐడీ అధికారులకు విస్తూపోయే నిజాలు ఒక్కొక్కటిగా బయటకొస్తున్నాయి. నిరక్షరాస్యులతో పాటు పాఠశాలకు రాని పదోతరగతి విద్యార్థులకు నకిలీ పత్రాలు తయారుచేసి ఇచ్చినట్లు దర్యాప్తులో గుర్తించారు. ఈ వ్యవహారంలో అబ్దుస్ సత్తార్ కీలకంగా వ్యవహరించడంతో సీఐడీ అధికారులు అతడిని విచారించి కీలక వివరాలు రాబట్టారు. నకిలీ విద్యార్హత పత్రాలను సృష్టించడం వెనక ఇమ్మిగ్రేషన్ (Visa Immigration) చెక్‌నాట్ రిక్వయిర్డ్ కేటగిరీ పాస్‌పోర్టులు పొందే కుయుక్తులకు ముఠా పాల్పడినట్లు తేల్చారు.

ప్రస్తుతం ఈ కేసులో ఇంకా ఎవరి హస్తం ఉన్నదానిపై ఫోకస్ చేసిన పోలీసులు జిల్లాల వారిగా దర్యాప్తు చేస్తున్నారు. ఎందరికి పాస్​పోర్టులు జారీ చేశారు. ఎంత మంది బయట దేశాలకు వెళ్లారు, ఎక్కడెక్కడ ఉన్నారు, ఇంకా ఎంతమంది విదేశాలకు వెళ్లడానికి సిద్ధంగా ఉన్నారన్న అంశాలపై దృష్టి సారించారు.