కాశీ వెళ్లాలనుకునే వారికి ఇదే మంచి అవకాశం - IRCTC మహా కుంభమేళా ప్యాకేజీ

ఈ నెల 14 నుంచి 45 రోజుల పాటు ప్రయాగ్‌రాజ్‌ మహా కుంభమేళా

MAHA KUMBH IRCTC package :ప్రయాగ్‌రాజ్‌ మహా కుంభమేళా ఈ నెల 14 నుంచి 45 రోజుల పాటు జరగనుంది. ఇందుకోసం ఇప్పటికే పలు ప్రత్యేక రైళ్లను నడుపుతోన్న రైల్వే శాఖ తాజాగా తెలుగు రాష్ట్రాల మరిన్ని రైళ్లను అందుబాటులోకి తెచ్చింది. రెండు రాష్ట్రాల నుంచి అదనంగా మరో 26 ప్రత్యేక రైలు సర్వీసులను నడపనున్నట్లు తెలిపింది. ఆంధ్రప్రదేశ్​లోని గుంటూరు, విజయవాడ, మచిలీపట్నం, కాకినాడ టౌన్‌ నుంచి రైళ్లు బయల్దేరనుండగా తెలంగాణలో మౌలాలి జంక్షన్‌, వికారాబాద్, సికింద్రాబాద్ స్టేషన్ల నుంచి ప్రత్యేక రైళ్లు వెళ్లనున్నాయి. ఉత్తర్‌ప్రదేశ్​లో జరిగే మహాకుంభమేళా నిర్వహణకు భక్తుల అవసరాలు, భద్రత కోసం ఆ రాష్ట్ర ప్రభుత్వం పెద్ద ఎత్తున ఏర్పాట్లు చేస్తోంది. ప్రయాగ్‌రాజ్‌ మహా కుంభమేళాలో 45 కోట్ల మంది భక్తులు గంగాస్నానం ఆచరించే అవకాశం ఉందని అధికారవర్గాల అంచనా.

ఐఆర్​సీటీసీ ప్యాకేజీ వివరాలివీ..

కాశీ, వారణాసి వెళ్లాలని ఎప్పటి నుంచో అనుకుంటున్న వారికి ఇప్పుడు చక్కని అవకాశం వచ్చింది. మరికొద్ది రోజుల్లో ప్రయాగ్‌రాజ్‌లో మహా కుంభమేళా జరగనుంది. ఇదే సమయంలో కాశీ విశ్వనాథుడిని దర్శనం చేసొచ్చేలా ఐఆర్​సీటీసీ టూర్‌ ప్యాకేజీతో ముందుకొచ్చింది. జనవరి 14 నుంచి 45 రోజుల పాటు జరగనున్న ప్రయాగ్‌రాజ్‌ మహా కుంభమేళాకు IRCTC ప్రత్యేక టూర్‌ ప్యాకేజీని ప్రకటించింది.

ప్రయాణం ఇలా..

విశాఖ- గోరఖ్‌పూర్‌ మధ్య జనవరి 5, 19, ఫిబ్రవరి 16 తేదీల్లో ప్రత్యేక రైలు(08562)ను ఈస్ట్‌కోస్ట్‌ రైల్వే నడపనుంది. ఆదివారం రాత్రి బయల్దేరి మంగళవారం రాత్రి గోరఖ్‌పూర్ చేరుకుంటుంది. తిరిగి (08561) జనవరి 8, 22, ఫిబ్రవరి 19 తేదీల్లో బుధవారాల్లో మధ్యాహ్నం బయల్దేరి శుక్రవారం విశాఖపట్నం చేరుకుంటుంది. విజయనగరం, శ్రీకాకుళం రోడ్డు, పలాస, బ్రహ్మపుర, ఛత్రపూర్‌, బలుగావ్‌, ఖుర్దారోడ్డు, భువనేశ్వర్‌ తదితర స్టేషన్లలో ఈ రైలు ఆగుతుంది. ఇక

సికింద్రాబాద్‌ నుంచి తొలి రోజు ఉదయం 9:25 గంటలకు (దానాపూర్‌ ఎక్స్‌ప్రెస్‌) ప్రారంభమవుతుంది. రెండో రోజు మధ్యాహ్నం 1.30గంటలకు వారణాసి చేరుకుని ముందుగా బుక్‌ చేసిన హోటల్‌కు చేరుకుంటారు. అదేరోజు సాయంత్రం గంగ హారతి దర్శించుకున్న అనంతరం రాత్రి భోజనం, బస అక్కడే ఉంటుంది.

మూడో రోజు ఉదయం టిఫిన్ తర్వాత వారణాసిలోని ప్రసిద్ధ ఆలయాల (కాశీ విశ్వనాథ ఆలయం, కాలభైరవ్‌ మందిర్‌, బిర్లా మందిర్‌ )ను సందర్శించుకోవచ్చు. సాయంత్రం షాపింగ్‌, వ్యక్తిగత పనులు చూసుకున్న అనంతరం రాత్రి భోజనం, బస వారణాసిలోనే ఉంటుంది.

నాలుగో రోజు ఉదయం అల్పాహారం తర్వాత ప్రయాగ్‌రాజ్‌ బయల్దేరి మధ్యాహ్నానికి చేరుకుంటారు. ప్రయాగ్‌రాజ్‌ శివార్లలో దించి అక్కడి నుంచి మహాకుంభమేళా నేపథ్యంలో ఏర్పాటుచేసిన టెంట్‌ సిటీకి తీసుకెళ్తారు. మహాకుంభమేళా టెంట్‌ సిటీలోనే రాత్రి భోజనం, బస చేయాల్సి ఉంటుంది.

ఐదో రోజు ఉదయం అల్పాహారం తర్వాత లగేజీని లాకర్‌ రూమ్‌లో పెట్టేసి త్రివేణి సంగమం, కుంభమేళాలో పాల్గొనవచ్చు. సాయంత్రం ప్రత్యేక వాహనాల్లో ప్రయాగ్‌రాజ్‌ జంక్షన్‌కు చేరుకుని అదే రోజు రాత్రి 7.45గంటలకు సికింద్రాబాద్‌ (12792) ఎక్స్‌ప్రెస్‌ రైలు బయల్దేరాల్సి ఉంటుంది. ఆరో రోజు రాత్రి 9.30గంటలకు సికింద్రాబాద్‌ చేరుకోవడంతో యాత్ర పూర్తవుతుంది. ఈ ట్రిప్‌ మొత్తం ఐదు రాత్రులు, ఆరు పగళ్లు కొనసాగుతుందని ఐఆర్​సీటీసీ వెల్లడించింది.

ఛార్జీలు ఇలా..

త్రీటైర్ ఏసీలో ఒక్కో ప్రయాణికుడికి సింగిల్ షేరింగ్‌ రూ.48,730, ట్విన్ షేరింగ్‌ ప్యాకేజీ రూ.31,610గా నిర్ణయించారు. ట్రిపుల్ షేరింగ్‌ రూ.29,390 చెల్లించాల్సి ఉంటుంది. 5 నుంచి 11 ఏళ్ల చిన్నారులకు (విత్ బెడ్‌) రూ.22,890, విత్ అవుట్ బెడ్ రూ.14,650 చెల్లించాలి.

స్లీపర్‌ క్లాస్‌ సింగిల్ షేరింగ్‌ రూ.45,700, ట్విన్ షేరింగ్‌ రూ.28,570, ట్రిపుల్ షేరింగ్‌ రూ.26,360. 5 నుంచి 11 ఏళ్ల మధ్య చిన్నారులకు విత్ బెడ్‌ రూ.19,860, విత్ అవుట్ బెడ్ రూ.11,620 చెల్లించాలి.

ఇవి గుర్తుంచుకోండి..

ఎంచుకున్న ప్యాకేజీని ప్రయాణం, ఏసీ గదులు, ప్రత్యేక షేరింగ్‌ వాహనాలు ఏర్పాటు చేస్తారు. ప్రయాణంలో మినహా మూడు రోజులు ఉదయం టిఫిన్‌, రాత్రి భోజనం అందిస్తారు. ప్రయాణ బీమా కూడా ఉంటుంది. పర్యటక ప్రదేశంలో ఎక్కడైనా ఎంట్రీ ఫీజులు ఉంటే యాత్రికులే చెల్లించుకోవాల్సి ఉంటుందని ఐఆర్​సీటీసీ స్పష్టం చేసింది.