ప్రధాని సభలోనూ పోలీసుల నిర్లక్ష్యం - అడుగడుగునా వైఫల్యం

AP Police Negligence in Praja Galam Sabha: ప్రజాగళం సభలో పోలీసుల ఘోర వైఫల్యం అడుగడుగునా కనిపించింది. పల్నాడు ఎస్పీ రవిశంకర్‌రెడ్డి, యంత్రాంగంతో సమర్ధవంతంగా పని చేయించటంలో విఫలమయ్యారని విపక్షాలు మండిపడ్డాయి. చివరికి ప్రధాని మోదీ వచ్చే సభలోనూ తీవ్ర నిర్లక్ష్యంగా వ్యవహించారని ఆగ్రహం వ్యక్తం చేశారు. నరేంద్ర మోదీకి చంద్రబాబు, పవన్ కల్యాణ్‌లు ఇచ్చే ఙాపిక్నలను కూడా ఎస్పీజీ భద్రతా సిబ్బంది అనుమతించినా, పోలీసులు అడ్డుకోవడం తీవ్ర విమర్శలకు తావిచ్చింది.

AP Police Negligence in Praja Galam Sabha: ప్రజాగళం సభలో రాష్ట్ర పోలీసుల నిర్లక్ష్యం, అత్యుత్సాహం వల్ల, తెలుగుదేశం అధినేత చంద్రబాబు, జనసేన అధ్యక్షుడు పవన్‌కల్యాణ్‌లు ప్రధాని నరేంద్రమోదీకి జ్ఞాపికలు బహుకరించలేకపోయారు. శాలువ కప్పి, పుష్ప గుఛ్చమిచ్చి సత్కరించుకోలేకపోయారు. ప్రధాని సభ వేదికపైకి వచ్చిన వెంటనే ఆయన్ను సత్కరించి జ్ఞాపికలు ఇవ్వాలని చంద్రబాబు, పవన్‌కల్యాణ్‌లు భావించగా ఎస్పీజీ సిబ్బంది సభ ముగిసిన అనంతరం జ్ఞాపికలు అందివ్వాలని సూచించారు. ప్రధానికి చంద్రబాబు వేంకటేశ్వర స్వామివారి ప్రతిమ, పవన్‌కల్యాణ్‌ చందనం మాల ఇవ్వాలనుకున్నారు. టీడీపీ ఎమ్మెల్యే అనగాని సత్యప్రసాద్‌ ఆ జ్ఞాపికలను తీసుకెళ్తుండగా, ఆంధ్రప్రదేశ్‌ పోలీసులు ఆయన్ను అడ్డగించారు. సత్యప్రసాద్‌ను లోపలికి అనుమతించాలని ప్రధానమంత్రి భద్రతా సిబ్బంది చెప్పినా సరే, వారు ఆ ఆదేశాలు ఖాతరుచేయలేదు. జిల్లా ఎస్పీ చెబితేనే అనుమతిస్తామని మొండిగా వాదించారు. ఎంత సేపు వాదించినా రాష్ట్ర పోలీసులు ఆయన్ను అనుమతించకపోవటంతో, జ్ఞాపికలను చంద్రబాబు, పవన్‌కల్యాణ్‌ల వద్దకు ఆయన చేరవేయలేకపోయారు.

ప్రధానమంత్రి పాల్గొన్న సభలో జరిగిన పలు సంఘటనలు, రాష్ట్ర పోలీసుల వైఫల్యానికి నిదర్శనంగా నిలుస్తున్నాయి. ప్రధాన వేదికకు సమీపంగా ఉన్న గ్యాలరీలోనే వాటర్ బాటిల్ విసరడం, తోపులాటలు వంటి ఘటనలు చోటుచేసుకున్నా, పోలీసులు పట్టించుకోలేదు. వీఐపీ గ్యాలరీ ప్రవేశమార్గంలో తొక్కిసలాట జరగడం, వీవీఐపీ, మీడియా గ్యాలరీల్లోకి కార్యకర్తలు చొచ్చుకు వచ్చి, తోపులాటకు దిగినా పోలీసులు ప్రేక్షకపాత్రకే పరిమితమయ్యారు. ప్రజలు, వీఐపీలు, వీవీఐపీలకు ప్రత్యేకమార్గాలు ఉన్నా పోలీసులు వారికి సరైన దిశానిర్దేశం చేయకుండా అందరినీ వీఐపీ ప్రవేశమార్గం వద్దకు పంపారు. మాజీ మంత్రులు, మాజీ ఎమ్మెల్యేలు సైతం ట్రాఫిక్ చిక్కుకుని, సభకు రాకుండానే వెనుదిరిగి వెళ్లాల్సి వచ్చింది.
అభివృద్ధి చెందిన ఏపీ కావాలంటే ఎన్డీఏ ప్రభుత్వం రావాలి: ప్రధాని మోదీ

ప్రధాని నరేంద్రమోదీ హాజరైన సభలోనే పోలీసులు విధి నిర్వహణలో విఫలమయ్యారు. ప్రధాని రావటానికి ముందుగానే సభా ప్రాంగణానికి చేరుకున్న ఎస్పీజీ బృందాలు,సభ నిర్వహణలో బందోబస్తు పరమైన లోపాలు ఉన్నాయని గుర్తించి అప్రమత్తం చేశారు. అప్పుడు పోలీసులు స్పందించలేదు. లైట్ల కోసం ఏర్పాటుచేసి టవర్ స్టాండ్ పైకి కొందరు కార్యకర్తలు ప్రమాదకరంగా ఎక్కారు. అది గమనించిన ప్రధాని మోదీ స్వయంగా వారిని ఉద్దేశించి, వెంటనే కిందకు దిగండంటూ వారించినా, పోలీసులు చర్యలు చేపట్టకపోవడం తీవ్ర విమర్శలకు తావిస్తోంది. సాక్షాత్తు దేశ ప్రధాని పోలీసులను అప్రమత్తం చేసినా, వారు స్పందించలేదు. దీన్నిబట్టి వారు విధి నిర్వహణను ఎంత తేలిగ్గా తీసుకున్నారో అర్థమవుతోంది.
ప్రజాగళంలో సభలో పోలీసుల వైఫల్యం - ప్రధాని ప్రసంగానికి పలుమార్లు ఆటంకం

పోలీసుల తీరుతో, సభకు వచ్చిన ముఖ్యనేతలకూ చేదు అనుభవాలు తప్పలేదు. సభా ప్రాంగణంలోకి వెళ్లేందుకు పోలీసులతో వాగ్వాదం చేయాల్సి వచ్చింది. కృష్ణా, గుంటూరు, ప్రకాశం, పశ్చిమగోదావరి జిల్లాలకు చెందిన టీడీపీ, జనసేన నేతలు పాసులు చూపించినా,వారిని లోపలికి అనుమతించలేదు. గ్యాలరీలోకి వెళ్లడానికి మాత్రమే పాస్ ఉందని, వాహనానికి పాస్ ఏదంటూ కొందరిని వేధించారు. పోలీసులతో వాదించలేక, కొందరు మాజీ ఎమ్మెల్యేలు, ఇతర ముఖ్య నేతలు గ్యాలరీల్లోకి వెళ్లకుండానే వెనుదిరిగారు.

సభలో పవన్‌కల్యాణ్‌, చంద్రబాబు, ప్రధాని మోదీ ప్రసంగిస్తున్న సమయంలో పలుమార్లు మైక్‌ పనిచేయకుండా ఆగిపోవడంపైనా అనుమానాలు వ్యక్తమయ్యాయి. పోలీసులు ఉద్దేశపూర్వకంగా వ్యవహరించారని తెలుగుదేశం నేతలు ఆరోపించారు. మైకుల వద్ద గుమ్మిగూడిన వారిని నియంత్రించడంలో విఫలమయ్యారని విమర్శించారు. పోలీసుల తీరుపై ప్రధాని మోదీ సైతం అసహనం వ్యక్తం చేశారని వెల్లడించారు. సభ ముగిసిన తర్వాత.. రాష్ట్ర పోలీసులు తీరుపై భాజపా జాతీయ పెద్దలకు... భారతీయ జనతా పార్టీ నేతలు ఫిర్యాదు చేశారు. సభకు పోలీసుల సహాయ నిరాకరణను కేంద్ర నేతల దృష్టికి తీసుకువెళ్లారు.