కల్తీ నెయ్యిపై సిట్​ విచారణ - మూడు రోజుల పాటు తిరుపతి, తిరుమలలో పర్యటన - SIT TEAM TO TIRUMALA

SIT TEAM TO TIRUMALA: టీటీడీ నెయ్యి కల్తీ ఘటనపై ప్రభుత్వం ఏర్పాటు చేసిన ప్రత్యేక దర్యాప్తు బృందం విచారణ ప్రారంభించింది. తిరుమల లడ్డూ పవిత్రతను శ్రీవారి ప్రతిష్ఠను దెబ్బతీసేందుకు జరిగిన కుట్ర కోణాన్ని చేధించడానికి కార్యాచరణ చేపట్టింది. శనివారం తిరుమల చేరుకున్న ప్రత్యేక దర్యాప్తు బృందం, మూడు రోజుల పాటు తిరుపతిలో ఉంటూ లోతుగా దర్యాప్తు చేయనుంది. సిట్​లోని 9 మంది సభ్యులు మూడు బృందాలుగా ఏర్పడి విచారణ చేపట్టాలని నిర్ణయించారు.

SIT TEAM TO TIRUMALA: తిరుమల శ్రీవారి లడ్డూ తయారీలో వినియోగించిన నెయ్యి కల్తీ చేసిన ఘటన నిగ్గు తెల్చేందుకు ప్రత్యేక దర్యాప్తు బృందం(Special Investigation Team) సిద్ధమయింది. కల్తీ నెయ్యి ఘటనలో విచారణ కోసం ప్రభుత్వం 9 మందితో సిట్​ను ఏర్పాటు చేసింది. గుంటూరు ఐజీ సర్వశ్రేష్ఠ త్రిపాఠి నేతృత్వంలో విచారణ సాగనుంది. విజయవాడ నుంచి తిరుమల చేరుకున్న సిట్‍ అధికారులు తిరుమల శ్రీవారిని దర్శించుకున్నారు.

కమిటీకి నేతృత్వం వహిస్తున్న గుంటూరు రేంజ్ ఐజీ సర్వశ్రేష్ఠ త్రిపాఠి, తిరుపతి ఏఎస్పీ వెంకట్రావు, డీఎస్పీలు సీతారామారావు, శివ నారాయణ స్వామి, సీఐలు సత్యనారాయణ, ఉమామహేశ్వర్, సూర్యనారాయణ స్వామివారి సేవలో పాల్గొన్నారు. స్వామివారి దర్శన అనంతరం టీటీడీ అధికారులు వారికి తీర్థప్రసాదాలను అందజేశారు. ఆలయం వెలుపల వైభోవత్సవ మండపం వద్ద సహస్ర దీపాలంకరణ సేవ ఉత్సవమూర్తులను త్రిపాఠి దర్శించుకున్నారు.

అనంతరం తిరుమల నుంచి బయలు దేరిన సిట్ సభ్యులు, తిరుపతిలోని పోలీసు అతిథిగృహంలో సమావేశం అయ్యారు. లడ్డూ అపవిత్రం చేయడం వెనకదాగిన కుట్రను వెలికితీసేందుకు అనుసరించాల్సిన విధానాలు, దర్యాప్తు తీరు తెన్నులను చర్చించారు. సాయంత్రం 6.30 గంటలకు ప్రారంభమైన సిట్‍ అధికారుల సమావేశం దాదాపు 2 గంటలకు పైగా సాగింది. సిట్‍ అధిపతి సర్వశ్రేష్ఠ త్రిపాఠి పూర్తి దర్యాప్తును పర్యవేక్షించనుండగా మిగిలిన ముగ్గురు IPS అధికారుల నేతృత్వంలో మూడు బృందాలు లోతుగా దర్యాప్తు చేయనున్నాయి. విశాఖ డీఐజీ గోపీనాథ్‍ జెట్టి, కడప ఎస్పీ హర్షవర్ధన్‍ రాజు, తిరుపతి ఏఎస్పీ వెంకటరావులు మూడు బృందాలకు నేతృత్వం వహించనున్నారు.

మూడు బృందాలుగా ఏర్పడి విచారణ: నెయ్యిని సరఫరా చేసిన ఏఆర్‍ డైయిరీ ఫుడ్స్ ప్రైవేట్‍ లిమిటెడ్‍ సంస్ధను తమిళనాడులోని దుండిగల్‍ వెళ్లి ఓ బృందం దర్యాప్తు చేపట్టనుంది. మరో బృందం తిరుమల వెళ్లి లడ్డూ పోటు, లడ్డూ విక్రయ కేంద్రాలు, లడ్డూ తయారీకి వినియోగించే ముడిసరుకలను పరిశీలించడంతో పాటు లడ్డూ తయారీలో పాల్గొంటున్న శ్రీవైష్ణవులను విచారించనుంది. మరో బృందం తిరుపతిలోని టీటీడీ పరిపాలనా భవనంలో నెయ్యి కొనుగోలు, ఒప్పందాలు, నాణ్యమైన నెయ్యి సరఫరా కోసం టీటీడీ, ఏఆర్‍ డైయిరీ మధ్య జరిగిన ఒప్పందాలను పరిశీలించనుంది.

వైఎస్సార్సీపీ పాలనలో నెయ్యి కోనుగోలుకు టెండర్ల నిబంధనలలో మార్పులు చేయడానికి దారి తీసిన పరిస్ధితులపై దర్యాప్తు చేయనుంది. సిట్‍ బృందం మూడు రోజుల పాటు తిరుపతిలో ఉండి విచారణ నిర్వహించనుంది. సిట్‍ కార్యకలపాల కోసం టీటీడీ శ్వేతభవనంలో కార్యాలయం ఏర్పాటు చేసేందుకు ఉన్నతాధికారులు చర్యలు చేపట్టారు. కల్తీ నెయ్యి వినియోగం వెనక ఎవరున్నారనే దానిపై సిట్‌ విచారణ జరపనుంది.