Prime Minister Modi Fired On YCP:వైసీపీ ప్రభుత్వం రాష్ట్రాన్ని తిరోగమనం బాట పట్టించిందని ప్రధాని మోదీ అన్నారు. రాజమహేంద్రవరంలో నిర్వహించిన కూటమి బహిరంగ సభలో ప్రసంగించిన ఆయన వైసీపీపై నిప్పులు చెరిగారు. ఈ ఎన్నికల్లో వైసీపీని ప్రజలు పూర్తిగా తిరస్కరిస్తారని పేర్కొన్నారు. చంద్రబాబు హయాంలో అభివృద్ధిలో ఏపీ నెంబర్‌వన్‌గా ఉండేదని, జగన్ ఐదేళ్ల ప్రభుత్వంలో పాలన పట్టాలు తప్పిందన్నారు. రాష్ట్రం అప్పుల ఊబిలో కూరుకుపోయిందన్నారు. వైసీపీ పాలనలో అభివృద్ధి సున్నా, కానీ, అవినీతి వందశాతం పెరిగిందన్నారు. రాష్ట్రం అభివృద్ధి చెందాలంటే డబుల్‌ ఇంజిన్‌ సర్కారు అవసరమని పేర్కొన్నారు.
రాజమహేంద్రవరం సభలో తెలుగులో ప్రసంగం ప్రారంభించిన ప్రధాని మోదీ, నా ఆంధ్రా కుటుంబసభ్యులకు నమస్కారాలు అంటూ ప్రసంగాన్ని ప్రారంభించారు. గోదావరి మాతకు ప్రణామాలు. ఈ నేలమీదే ఆదికవి నన్నయ తొలి కావ్యం రాశారు. ఈ నేల నుంచే ఇప్పుడు సరికొత్త చరిత్ర లిఖించబోతున్నాం. దేశంలో, రాష్ట్రంలో ఎన్టీఏ కూటమి అధికారంలోకి వస్తుంది. ఇప్పుడు అసెంబ్లీ ఎన్నికలు జరిగే రాష్ట్రాల్లో ఎన్డీఏదే అధికారమని నరేంద్ర మోదీ తెలిపారు. జగన్ ఐదేళ్ల హయాంలో పాలన పట్టాలు తప్పిందని ఎద్దేవా చేశారని మోదీ మండిపడ్డారు. ఈ రాష్ట్రం ప్రతిభావంతులైన యువతకు నెలవు, టెక్నాలజీలో ఏపీ యువత శక్తిని ప్రపంచం గుర్తించిందని వెల్లడించారు.
కాంగ్రెస్ పార్టీ పట్ల ప్రజలు అప్రమత్తంగా ఉండాలని ప్రధాని మోదీ పిలుపునిచ్చారు. పదేళ్ల క్రితం దేశాన్ని కాంగ్రెస్ పార్టీ అథోగతిపాలు చేసిందని ఆరోపించారు. ఈడీ.. ఈడీ.. అంటూ ఇండి కూటమి గగ్గోలు పెడుతోందని, ఝార్ఖండ్‌ కాంగ్రెస్ నేతల వద్ద కట్టలకొద్దీ డబ్బు దొరికిందని ప్రధాని మోదీ పేర్కొన్నారు. కాంగ్రెస్ నేతల డబ్బును మిషన్లు కూడా లెక్కపెట్టలేకపోతున్నాయని ధ్వజమెత్తారు. కాంగ్రెస్ నేతల ఇళ్లలోనే ఎందుకు గుట్టలుగా డబ్బు దొరుకుతోంది?, గుట్టలకొద్దీ డబ్బుపై కాంగ్రెస్ రాకుమారుడు జవాబు చెప్పాలని మోదీ డిమాండ్ చేశారు. దోచుకున్న డబ్బు తెచ్చి ఎలా పేదలకు పంచాలో ఆలోచిస్తున్నానని మోదీ వెల్లడించారు.
'వీసీల నియామకంపై రాహుల్ అసత్య ప్రచారం'- చర్యలు తీసుకోవాలన్న విద్యావేత్తలు - Vice Chancellors On Rahul Gandhi