'గ్రూప్​-1 పాత నోటిఫికేషన్ రద్దు చేయకుండా - కొత్త నోటిఫికేషన్ చెల్లదు' - PETITIONS ON TG GROUP1 NOTIFICATION

Group-1 Mains Exams: గ్రూప్-1 మెయిన్స్ పరీక్షలు మరో 20 రోజుల్లో జరగనుండగా, దీనిపై హైకోర్టులో పలువురు పిటిషన్లు దాఖలు చేశారు. పాత నోటిఫికేషన్​ను రద్దు చేయకుండా మరో కొత్త నోటిఫికేషన్​ను జారీ చేశారని పిటిషన్​లో పేర్కొన్నారు. దీనిపై హైకోర్టు ధర్మాసనం విచారణ చేపట్టింది.

TGPSC Group-1 Notification :గ్రూప్-1 పోస్టుల భర్తీ నిమిత్తం 2022లో జారీ చేసిన నోటిఫికేషన్‌ను రద్దు చేయకుండా మరో నోటిఫికేషన్ జారీ చేయడం చెల్లదంటూ హైకోర్టులో పిటిషన్లు దాఖలయ్యాయి. వికారాబాద్, యాదాద్రి భువనగిరి, హనుమకొండ, వరంగల్ జిల్లాలకు చెందిన జి.దామోదర్​ రెడ్డి, మరో ఐదుగురు హైకోర్టులో పిటిషన్ దాఖలు చేశారు. దీనిపై జస్టిస్ పుల్లా కార్తీక్​ విచారణ చేపట్టారు.

పిటిషనర్ తరఫు సీనియర్ న్యాయవాది సుధీర్ వాదనలు వినిపిస్తూ, 2022లో 503 పోస్టుల భర్తీకి నోటిఫికేషన్ జారీ చేశారని, వివిధ కారణాల వల్ల పరీక్ష రద్దయిందని, అయితే గతంలో పరీక్షలో పాల్గొన్న అభ్యర్థులకే దీన్ని పరిమితం చేయాల్సి ఉందన్నారు. 503 ఖాళీలకు అదనంగా మరో 60 పోస్టులను కలిపి తాజాగా నోటిఫికేషన్ జారీ చేయడం చెల్లదన్నారు. కొత్తగా ఏర్పడిన 60 ఖాళీలకు ప్రత్యేకంగా మరో నోటిఫికేషన్ జారీ చేసేలా ఆదేశాలు ఇవ్వాలని కోరారు.

అంతేగాకుండా ఎస్టీ రిజర్వేషన్లను 6 శాతం నుంచి 10 శాతానికి పెంచడం సరికాదన్నారు. ప్రభుత్వ ప్రత్యేక న్యాయవాది రాహుల్‌ రెడ్డి వాదనలు వినిపిస్తూ టీజీపీఎస్సీ రాజ్యాంగబద్ధమైన సంస్థ అని, పరీక్షను రద్దు చేసి తాజాగా నోటిఫికేషన్ జారీ చేసే అధికారం ఉందన్నారు. అదనపు ఖాళీలను చేర్చడం వల్ల అభ్యర్థులకు ప్రయోజనం ఉంటుందని తెలిపారు. దీనిపై తదుపరి విచారణను న్యాయమూర్తి ఈ నెల 30 కి వాయిదా వేశారు.

చివరి దశ ప్రిపరేషన్​లో అభ్యర్థులు : ఇదిలా ఉండగా అక్టోబర్​ నెలలో 21వ తేదీ నుంచి 27 వరకు మెయిన్స్ పరీక్షలు జరగనున్నాయి. ప్రస్తుతం అభ్యర్థులు గ్రూప్​-1 పరీక్ష ప్రిపరేషన్​లో చివరి దశకు చేరుకున్నారు. మెయిన్స్​ పరీక్షలకు ఇంకో 20 రోజులు మాత్రమే సమయం ఉంది. గత బీఆర్​ఎస్​ ప్రభుత్వంలో గ్రూప్​-1 పరీక్ష పేపర్​ లీక్​ అవ్వడంతో అభ్యర్థులు తీవ్ర మనోవేదనకు గురయ్యారు. ఆ తరువాత మళ్లీ పరీక్ష నిర్వహించినప్పటికీ హల్​టికెట్​పై అభ్యర్థుల ఫొటో లేకపోవడంతో హైకోర్టు రద్దు చేస్తూ ఆదేశాలు జారీ చేసింది. 2023 అసెంబ్లీ ఎన్నికల్లో కాంగ్రెస్​ ఏర్పడిన తర్వాత సీఎం రేవంత్​ రెడ్డి ప్రభుత్వం నిరుద్యోగుల వల్లే ఈ ప్రభుత్వం ఏర్పడిందని పలు సందర్భాల్లో పునరుద్ఘాటించారు. దానికి అనుగుణంగా 2 లక్షల ఉద్యోగాలు భర్తీ చేస్తామని ప్రకటించారు. దానిలో భాగంగా పలు ఉద్యోగాలకు నోటిఫికేషన్లను జారీ చేశారు. తేదీలు ప్రకటించిన చాలా కాలం తర్వాత పరీక్ష నిర్వహించే ముందు కొంతమంది వాయిదా వేయాలని నిరసనలు చేస్తున్నారు. దీని వల్ల గ్రూప్​-2 పరీక్ష ఇప్పటికీ నాలుగుసార్లు వాయిదా పడింది.