'ఎన్టీఆర్ సార్ గురించి నేను తప్పుగా మాట్లాడలేదు - అభిమానులు అపార్థం చేసుకోవద్దు'

ఎన్టీఆర్ అభిమాని కౌశిక్ డిశ్చార్జ్‌ - రూ.12 లక్షల బిల్లు చెల్లించిన ఎన్టీఆర్

NTR Fan Kaushik Mother Issue :రాష్ట్రానికి చెందిన కౌశిక్‌ (19) కొంతకాలంగా బోన్‌ క్యాన్సర్‌తో బాధపడుతున్నాడు. అతను జూనియర్ ఎన్టీఆర్‌ వీరాభిమాని కావడంతో చనిపోయేలోపు దేవర చూడాలని కోరుకుంటున్నట్లు అతడి తల్లిదండ్రులు సెప్టెంబర్​లో తెలిపారు. అదేవిధంగా తన కుమారుడి వైద్యానికి రూ.60లక్షలు ఖర్చు అవుతుందని ప్రభుత్వం, దాతలు సాయం చేయాలని కౌశిక్‌ తల్లి మీడియా ఎదుట కోరారు. సన్నిహితుల ద్వారా ఈ విషయం తెలుసుకున్న జూనియర్ ఎన్టీఆర్‌, కౌశిక్‌కు వీడియో కాల్‌ చేసి మాట్లాడారు. ఆ యువకుడికి ధైర్యం చెప్పారు. ఆరోగ్యం తర్వాతే సినిమా అని, త్వరగా కోలుకోవాలని ఆయన ఆకాంక్షించారు. తల్లిదండ్రులు కౌశిక్​ను జాగ్రత్తగా చూసుకోవాలని ఎన్టీఆర్ సూచించారు. ఇది కాస్తా సోషల్ మీడియాలో వైరల్​గా మారిన విషయం తెలిసిందే.

ఈ నేపథ్యంలోనే వైద్యులు కౌశిక్​కి చికిత్స అందించడంతో కోలుకున్నాడు. అయితే ఈ క్రమంలోనే సోమవారం నాడు ఆ యువకుడి తల్లి సరస్వతి మీడియాకు ముందుకొచ్చి మాట్లాడారు. ఈ సందర్భంగా ఆమె వ్యాఖ్యలు కొన్ని సామాజిక మాధ్యమాల్లో హాట్‌టాపిక్‌గా మారాయి. దీనిపై తాజాగా ఆమె మరోసారి వివరణ ఇచ్చారు. జూనియర్ ఎన్టీఆర్‌ సర్‌ గురించి తాను తప్పుగా మాట్లాడలేదని చెప్పారు. మీడియా వాళ్లు అడిగిన ప్రశ్నలకు సమాధానం ఇచ్చినట్లు పేర్కొన్నారు. తమ కుటుంబమంతా ఎన్టీఆర్ అభిమానులమేనని వివరించారు.

NTR Fan Kaushik Bill Controversy :మంగళవారం సాయంత్రం ఎన్టీఆర్‌ టీమ్‌ తనకు కాల్‌ చేసిందని సరస్వతి పేర్కొన్నారు. తాము వస్తున్నట్లు డిశ్చార్జ్‌ చేయిస్తామని వెల్లడించారు. తమ అబ్బాయి ఆరోగ్య పరిస్థితిని వైద్యులను అడిగి తెలుసుకున్నట్లు వివరించారు. వారే రూ.12 లక్షల బిల్లు చెల్లించి డిశ్చార్జ్‌ చేయించారని తెలిపారు. తన కుమారుడి ఆరోగ్యం ఇప్పుడు చాలా మెరుగ్గా ఉందన్నారు. మంగళవారం తాను మాట్లాడిన మాటల వల్ల ఎన్టీఆర్‌ అభిమానులు ఫీలైనట్టు ఉన్నారని ఆవేదన చెందారు. మీరు అపార్థం చేసుకున్నారేమో మీ అందరి ఆశీస్సుల వల్లే కౌశిక్ బాగున్నాడని చెప్పారు. తన కుమారుడి చికిత్సకు అయిన ఖర్చును భరించిన ఎన్టీఆర్‌కు సరస్వతి కృతజ్ఞతలు తెలియజేశారు.