పెండింగ్‌ పోస్టులన్నీ భర్తీ చేస్తాం - రెండేళ్లలో సెంట్రల్ ట్రైబల్ వర్సిటీ పూర్తి : లోకేశ్

వచ్చే రెండేళ్లలో గిరిజన వర్సిటీ నిర్మాణం పూర్తిచేస్తామన్న లోకేశ్

Lokesh on DSC Notification : రెండో రోజుఅసెంబ్లీ బడ్జెట్ సమావేశాలు కొనసాగుతున్నాయి. ఈ క్రమంలోనే బీజేపీ ఎమ్మెల్యే విష్ణుకుమార్ రాజు 1998 డీఎస్సీకి సంబంధించిన అంశంపై ప్రశ్నించారు. పలువురు శాసన సభ్యలు దీనిపై ప్రశ్నలు లేవనెత్తారు. వీటికి విద్యాశాఖ మంత్రి నారా లోకేశ్ సమాధానం ఇచ్చారు. ఇటీవలే 16,000 పైచిలుకు ఉపాధ్యాయుల పోస్టులు భర్తీ చేసేందుకు మెగా డీఎస్సీ ప్రకటించామని తెలిపారు. న్యాయవివాదాల పరిష్కారం తర్వాత త్వరలోనే డీఎస్సీ ద్వారా భర్తీ చేస్తామని లోకేశ్ వెల్లడించారు.

1998 డీఎస్సీలో ఉత్తీర్ణులైన వారిలో 18,008 మంది నియమితులయ్యారని లోకేశ్​ పేర్కొన్నారు. ఆ తర్వాత పెండింగ్​లో ఉన్న 4,534 పోస్టుల్లో ఎంటీఎస్ ద్వారా 3939 పోస్టులు భర్తీచేశారని తెలిపారు. ఇంకా 595 పోస్టులు భర్తీచేయాల్సి ఉందన్నారు. ఇంకా ఎక్కువ ఉన్నాయని సభ్యులు చెబుతున్నారని వాటిని పరిశీలించి న్యాయం చేస్తామని చెప్పారు. ఎంటీఎస్ కింద నియమితులైన అభ్యర్థులకు నిబంధనల ప్రకారం వారికి ఎటువంటి రిటైర్​మెంట్ బెనిఫిట్స్ ఉండవని వివరించారు. వారికి రిటైర్​మెంట్ వయసు 60సంవత్సరాలని, సభ్యులు లేవనెత్తిన సమస్యపై ముఖ్యమంత్రితో చర్చించి నిర్ణయం తీసుకుంటామని లోకేశ్ వివరించారు.

AP Assembly Sessions 2024 : మరోవైపు విభజనచట్టం ప్రకారం పెండింగ్​లో ఉన్న విద్యాసంస్థలపై శాసనసభ్యులు బుచ్చయ్యచౌదరి, బోండా ఉమ ప్రశ్నలు అడిగారు. వీటిపై మంత్రి నారా లోకేశ్ సమాధానం ఇచ్చారు. గత ప్రభుత్వ హయాంలో ట్రైబల్ వర్సిటీ స్థలం మార్చి ఐదేళ్లు పనులు ముందుకు సాగకుండా జాప్యం చేశారని ఆయన ఆరోపించారు. రాజకీయంగా తమకు మంచిపేరు వస్తుందని స్థలాన్ని మార్చారని విమర్శించారు. 2019లో నిర్ణయించిన స్థలంలోనే వచ్చే రెండేళ్లలో సెంట్రల్ ట్రైబల్ వర్సిటీ పూర్తిచేస్తామని లోకేశ్​ స్పష్టం చేశారు.

2014-19 మధ్య చంద్రబాబునాయుడు అభివృద్ధి వికేంద్రీకరణకు ప్రాధాన్యత ఇచ్చారని లోకేశ్ వివరించారు. ఉమ్మడి జిల్లాల ప్రాతిపదికన సెక్టార్​వైజ్ ఫోకస్ పెట్టి అభివృద్ధి కార్యక్రమాలు చేపట్టారని తెలిపారు. అనంతపురం జిల్లాకు కియా తెచ్చారని, చిత్తూరులో ఎలక్ట్రానిక్స్, నెల్లూరు విండ్ టర్బైన్, కర్నూలు రెన్యువబుల్ ఎనర్జీ, ఉభయగోదావరిలో ఆక్వా, ఉత్తరాంధ్ర ఐటీ, మెడికల్ డివైస్, ఫార్మా పరిశ్రమలను ప్రోత్సహించారని పేర్కొన్నారు. విభజన చట్టంలో రాష్ట్రానికి కేటాయించిన విద్యాసంస్థలను కూడా వేర్వేరు ప్రాంతాల్లో ఏర్పాటు చేశారని లోకేశ్ వెల్లడించారు.

ఐఐటీ తిరుపతికి, ఐఐఎం విశాఖకి, ఎన్ఐటీ తాడేపల్లిగూడెంకు, ట్రిపుల్ ఐటీ కర్నూలుకు, సెంట్రల్ వర్సిటీ అనంతపురానికి కేటాయించారని లోకేశ్ పేర్కొన్నారు. అభివృద్ధి వికేంద్రీకరణ అంటే ఇది అని చెప్పారు. రూ.500 కోట్లతో ప్యాలెస్ కట్టుకోవడం కాదని వ్యంగాస్త్రాలు సంధించారు. ఐఐటీ తిరుపతికి ఆగస్టు 9, 2016లోనే భూములు కేటాయించి పనులు ప్రారంభించారని వివరించారు. ఎన్ఐటీ తాడేపల్లిగూడెంకు ఏప్రిల్ 16, 2016లో 172 ఎకరాలు, విశాఖలో ఐఐఎంకు ఏప్రిల్ 16, 2016లో 240 ఎకరాలు, సెంట్రల్ వర్సిటీ అనంతపురానికి ఏప్రిల్ 16, 2016లో 491 ఎకరాలు, ఐషర్​కు 255 ఎకరాలు, ట్రిపుల్ ఐటీలకు కూడా భూములు అప్పట్లోనే కేటాయించారని లోకేశ్ గుర్తుచేశారు.

వెంటనే పరిష్కరించేందుకు కృషిచేస్తాం : యుద్ధప్రాతిపదికన భూములు కేటాయించడమేగాక, కేంద్ర ప్రభుత్వం నుంచి వచ్చే నిధులు వచ్చేలా సీఎం చంద్రబాబు చేశారని లోకేశ్ గుర్తుచేశారు. ఆనాడు పనుల పురోగతి ప్రతినెలా ముఖ్యమంత్రి సమీక్షించారని చెప్పారు. పనులను పూర్తిచేసేందుకు చిత్తశుద్ధితో కృషిచేశారని వివరించారు. మరోవైపు ఆయా విద్యాసంస్థల్లో పెండింగ్​లో ఉన్న రోడ్లు, తాగునీరు, ఇతర మౌలిక సదుపాయాల సమస్యలను వెంటనే పరిష్కరించేందుకు కృషిచేస్తామని లోకేశ్ స్పష్టం చేశారు.