ఇంటికి వెళ్లిన మోహన్​బాబు - ఆస్పత్రి నుంచి డిశ్చార్జ్‌

మంగళవారం కాంటినెంటల్ ఆస్పత్రిలో చేరిన మోహన్‌బాబు - రెండు రోజులపాటు ఆస్పత్రిలో

Mohan Babu Discharged from Hospital : ఇటీవల అస్వస్థతకు గురై ఆసుపత్రిలో చేరిన మంచు మోహన్‌బాబు డిశ్చార్జ్‌ అయ్యారు. మంగళవారం హైదరాబాద్​లోని కాంటినెంటల్ ఆస్పత్రిలో చేరిన మోహన్‌బాబుకు రెండు రోజులపాటు చికిత్స అందించారు. చికిత్స తర్వాత గురువారం మధ్యాహ్నం 2 గంటలకు డిశ్చార్జ్ అయ్యారు.

ఇదీ జరిగింది:కాగా హైదరాబాద్​లోని జల్‌పల్లిలోని మోహన్ బాబు నివాసం వద్ద మంగళవారం జరిగిన ఘర్షణ అనంతరం సినీనటుడు మోహన్‌బాబు హాస్పిటల్​లో చేరారు. అస్వస్థతకు గురి కావడంతో గచ్చిబౌలిలోని కాంటినెంటల్‌ ఆస్పత్రికి వెళ్లారు. అక్కడ ఆయనకు వైద్యులు చికిత్స అందించారు. అనంతరం బుధవారం ఉదయం మోహన్‌బాబు ఆరోగ్య పరిస్థితిపై హాస్పిటల్ వైద్యులు హెల్త్‌ బులెటిన్‌ విడుదల చేశారు.

బుధవారం విడుదల చేసి హెల్త్​ బులిటెన్​లో మోహన్‌బాబుకు బీపీ ఎక్కువగా ఉండి అధిక నొప్పులతో హాస్పిటల్‌లో చేరారని కాంటినెంటల్​ ఆసుపత్రి వైద్యులు వెల్లడించారు. ఆయనకు కొన్ని గాయాలతోపాటు కంటి కింద వాపుగా ఉందని పేర్కొన్నారు. రెండు రోజుల చికిత్స అనంతరం మోహన్ బాబును నేడు డిశ్చార్జ్ చేశారు.

మరోవైపు కుటుంబ వివాదం నేపథ్యంలో రాచకొండ సీపీ ముందు మోహన్ బాబు హాజరుకావాల్సి ఉంది. అయితే రాచకొండ పోలీసులు ఇచ్చిన నోటీసులపై మోహన్‌బాబు, విష్ణు హైకోర్టును ఆశ్రయించడంతో అక్కడ వారికి ఊరట లభించింది. ఈ నెల 24 వరకు హాజరు నుంచి మినహాయింపు ఇస్తూ హైకోర్టు తీర్పు ఇచ్చింది. మంచు కుటుంబంలో ఉద్రిక్తతల నేపథ్యంలో మోహన్‌బాబు, మనోజ్‌ లైసెన్స్‌డ్‌ తుపాకులను పోలీసులు స్వాధీనం చేసుకున్నారు.

మీడియా ప్రతినిధిపై దాడి:దీనికి తోడు జల్‌పల్లిలోని నివాసం వద్ద మంగళవారం ఘర్షణ చోటుచేసుకున్న సమయంలో మీడియా ప్రతినిధిపై మోహన్‌బాబు దాడి చేశారు. మోహన్‌బాబు క్షమాపణ చెప్పాలంటూ ఇప్పటికే మీడియా సంఘాలు డిమాండ్ చేస్తున్నాయి. మీడియా ప్రతినిధిపై మోహన్‌బాబు దాడిని జర్నలిస్ట్ సంఘాలు ఖండించాయి. ఈ నేపథ్యంలోనే ఇప్పటికే పహాడిషరీఫ్ పోలీసులు మంచు మోహన్​బాబుపై బీఎన్‌ఎస్‌ (Bharatiya Nyaya Sanhita) 118 సెక్షన్‌ కింద కేసు నమోదు చేశారు.