IPS PSR Anjaneyulu Try to Meet CM Chandrababu: హైదరాబాద్‌ పర్యటనలో ఉన్న ముఖ్యమంత్రి చంద్రబాబును కలిసేందుకు ఐపీఎస్ అధికారి పీఎస్సార్ ఆంజనేయులు విఫలయత్నం చేశారు. అపాయింట్మెంట్ లేదని చెప్పినా ఆయన చంద్రబాబు ఇంటి చుట్టూ చక్కర్లు కొట్టారు. జూబ్లీహిల్స్‌లో చంద్రబాబు ఇంటి వద్దకు మాజీ ఇంటెలిజెన్స్ చీఫ్ సీతారామాంజనేయులు శనివారం రెండు సార్లు వెళ్లినట్లు సమాచారం. అయితే ఆయనకు సమయం ఇచ్చేందుకు ముఖ్యమంత్రి కార్యాలయం నిరాకరించింది. గేటు దగ్గర నుంచే అధికారిని భద్రతా సిబ్బంది వెనక్కి పంపారు. పిలుపు లేకపోయినా, సమయం ఇవ్వక పోయినా చంద్రబాబును కలిసేందుకు వైఎస్సార్సీపీ విధేయులుగా ముద్రపడ్డ అధికారులు విఫల యత్నాలు చేస్తున్నారు.
వైఎస్సార్సీపీతో అన్ని విధాలుగా అంటకాగి, ఆ పార్టీ అరాచకాలకు కొమ్ము కాశారనే విమర్శలు ఎదుర్కొంటున్న నిఘా విభాగం మాజీ అధిపతి పి. సీతారామాంజనేయులు ముఖ్యమంత్రి చంద్రబాబును ప్రసన్నం చేసుకునేందుకు అనేక పాట్లు పడుతున్నారు. అపాయింట్మెంట్ లేకున్నా సరే సీఎంను కలవాలంటూ ఆయన నివాసం చుట్టూ తిరుగుతున్నారు. చంద్రబాబు గత రెండు రోజులుగా హైదరాబాద్‌లో ఉండటంతో జూబ్లీహిల్స్‌లోని ఆయన నివాసం వద్దకు సీతారామాంజనేయులు శని, ఆదివారాల్లో మూడు సార్లు వెళ్లారు. భద్రతా సిబ్బంది ఆయన్ను గేటు వద్దే ఆపేసి వెనక్కి పంపించేశారు. ముందస్తు అపాయింట్‌మెంట్లు, అనుమతులు లేకుండా ముఖ్యమంత్రి ఎవర్నీ కలవడం లేదని చెప్పి తిప్పి పంపించేశారు. అపాయింట్మెంట్ కోసం ప్రయత్నించినా అందుకు నిరాకరించారు.