Head Constable VM Basha Suspended : కడప తాలూకా స్టేషన్లో హెడ్ కానిస్టేబుల్‌గా పని చేస్తున్న వీఎం బాషా అవినీతికి చిరునామాగా మారారు. పోలీసు బాసులను సైతం బెదిరిస్తూ బ్లాక్ మెయిల్ చేయడం, రాష్ట్ర పోలీస్ అధికారులకు ఫిర్యాదులు చేయడంతో అందరికీ తలనొప్పిగా మారాడు. కడపలో పలు పోలీస్ స్టేషన్లలో పని చేసిన హెడ్ కానిస్టేబుల్, కడపలో పలువురిని బెదిరించి భూములు ఆక్రమించి, సెటిల్ మెంట్లు చేసినట్లు ఆరోపణలు ఉన్నాయి.
కడప శివారులోని సర్వేనంబరు 147/E లోని 1.23 ఎకరాల భూమి రామరాజుపల్లెకు చెందిన శ్రీనివాసరెడ్డిది. కోట్ల రూపాయల విలువ చేసే ఈ భూమిని వీఎం బాషా నకిలీ డాక్యుమెంట్లు సృష్టించి ఇతరులకు 3 కోట్ల రూపాయలకు ప్లాట్ల రూపంలో విక్రయించాడు. దాదాపు 15 మందికి ఆ భూమిని రిజిస్ట్రేషన్ కూడా చేయించారు. దీంట్లో కడప రూరల్ సబ్ రిజిస్ట్రార్ సుందరేశం పాత్ర కూడా ఉందని అభియోగాలు ఉన్నాయి. దీనిపై బాధితుడు శ్రీనివాస్ రెడ్డి పోలీసులకు ఫిర్యాదు చేసినా మొదట స్పందించలేదు. దీంతో రాష్ట్ర స్థాయి పోలీసు అధికారులను కలిసి ఫిర్యాదు చేయగా జిల్లా పోలీసులు విచారణ జరిపారు. ఎట్టకేలకు ఈ ఏడాది జనవరి 30న కడప తాలూకా పోలీస్ స్టేషన్లో బాధితుడు శ్రీనివాస్ రెడ్డి ఫిర్యాదు మేరకు హెడ్ కానిస్టేబుల్ వీఎం బాషాపై కేసు నమోదు అయ్యింది.
15 ఏళ్లుగా మహిళతో ఏఆర్ ఎస్సై సహజీవనం - వదిలించుకునేందుకు బెదిరింపులు
వీఎం బాషాతో పాటు గజరాంపల్లె మనోహర్, గుల్జార్ బేగం, కడప రూరల్ సబ్ రిజిస్ట్రార్ సుందరేశంపై కూడా కేసు నమోదు అయ్యింది. వీళ్లందరిపై ఐపీసీ 420, 468, 471, 120-B సెక్షన్ల కింద కేసులు నమోదు చేశారు. హెడ్ కానిస్టేబుల్ బాగోతాన్ని లోతుగా విచారణ జరిపిన పోలీసులు జిల్లా ఎస్పీకి నివేదిక ఇచ్చారు. నివేదిక ఆధారంగా హెడ్ కానిస్టేబుల్ వీఎం బాషాను జిల్లా ఎస్పీసిద్ధార్థ కౌశల్ సోమవారం సస్పెండు చేశారు.