అగ్ని ప్రమాదం సంభవించిందా? - అయితే కంగారు పడకండి - ఇలా చేస్తే సరి! - Fire Mock Drill In Hyderabad

Fire Safety Week celebrations : చూస్తుండగానే 13 అంతస్థుల భవనాన్ని మంటలు చుట్టుముట్టాయి. వీటిని చూసి అంతా ఉలిక్కిపడ్డారు. భవనంలో చిక్కుకున్న వారిని సురక్షితంగా బయటకు తీసుకువచ్చేందుకు తోటి సిబ్బంది శ్రమించారు. సమాచారం అందుకుని ఘటన స్థలానికి చేరుకున్న అగ్నిమాపక సిబ్బంది బ్రాంటో స్కైలిఫ్ట్‌ వాహనం ద్వారా భవనంలో చిక్కుకున్న ఇద్దరిని బయటకు తీసుకువచ్చారు. కానీ ఇదంతా అగ్నిమాపకశాఖ మాక్‌డ్రిల్‌లో అని తెలిసి అంతా ఊపిరి పీల్చుకున్నారు.

Fire Mock Drill In Hyderabad :ప్రమాదాలు జరిగిన తర్వాత తీసుకునే చర్యలు కంటే అవి జరగకుండానే జాగ్రత్తలు తీసకుంటే మేలంటున్నారు అగ్నిమాపక శాఖ అధికారులు. ఇందులో భాగంగానే అగ్నిమాపక వారోత్సవాల ముగింపు సందర్భంగా ఆ శాఖ సిబ్బంది, అధికారులు హైదరాబాద్‌ మాదాపూర్‌లోని బహుళ అంతస్తుల భవనంలో మాక్‌డ్రిల్‌ నిర్వహించారు. ప్రమాదాలు జరిగినప్పుడు ఆయా భవనాల్లో ఉండే వారు ఎలా స్పందించాలి, తక్షణం చేయాల్సిన పనులేంటి? సమయస్ఫూర్తిగా ఎలా నడుచుకోవాలి తదితర అంశాలపై చైతన్యం కల్పించారు.

Fire Safety Week celebrations in Telangana 2024 :భవనం పైఅంతస్తులో మంటల్లో చిక్కుకుంటే వారిని బ్రాంటో స్కైలిఫ్ట్‌ వాహనం ద్వారా సురక్షితంగా బయటకు తీసుకువచ్చే విధానాన్ని అగ్నిమాపక శాఖ కళ్లకుకట్టింది. మంటల్ని నియంత్రించేందుకు ఉపయోగించే పరికరాలను పరిచయం చేశారు. అగ్నిమాపక వారోత్సవాల్లో అన్ని జిల్లాల్లో కలిపి 40 వేల మంది సిబ్బంది పాల్గొన్నారు.

ప్రధానంగా పరిశ్రమలు, పెట్రోల్‌ బంక్‌లు, ఆసుపత్రులు, ఎల్పీజీ గోదాములు, బహుళ అంతస్తుల భవనాలు, షాపింగ్‌ మాల్స్‌లో అగ్నిప్రమాదాలు జరిగితే తీసుకోవాల్సిన చర్యలపై అవగాహన కల్పించారు. ఎలాంటి సవాళ్లనైనా ఎదుర్కొనేందుకు అగ్నిమాపక సిబ్బంది, అధికారులు సిద్దంగా ఉండాలని ఆ శాఖ డీజీ నాగిరెడ్డి సూచించారు. అగ్నిప్రమాదాల నివారణపై తగిన అవగాహన కలిగి ఉంటే ప్రమాద తీవ్రత పెరగకుండా అరికట్టవచ్చని అగ్నిమాపక శాఖ చెబుతోంది.

"ఏప్రిల్ 14 నుంచి అగ్నిమాపక వారోత్సవాలు నిర్వహిస్తున్నాం. వారోత్సవాల్లో బాగంగా అగ్నిప్రమాదాలపై ప్రజలకు అవగాహన కల్పించనున్నాం. వేసవిలో అగ్నిప్రమాదాలు జరిగే అవకాశం ఉన్నందున వాటిపై అందరికీ అవగాహన కల్పించాలనేదే ఈ కార్యక్రమం ముఖ్య ఉద్దేశం. ప్రతి బిల్డింగ్​లో స్మోక్ డిటెక్టర్ ఉంటాయి. మంటలు రాగానే అలారం మోగుతుంది. సెక్యూరిటీ సిబ్బంది స్పందించి మంటలను అదుపు చేస్తారు." -నాగిరెడ్టి, అగ్నిమాపక శాఖ డీజీ

Fire Accidents In Telangana :ఏటా జరుగుతున్న అగ్నిప్రమాదాల్లో ప్రాణ, ఆస్తి నష్టాలు భారీగా చోటుచేసుకుంటున్నాయి. 2021 లో 85 భారీ అగ్నిప్రమాదాలు జరిగాయి. 2022లో వీటి సంఖ్య 104కు చేరింది. 2021లో జరిగిన ప్రమాదాల్లో 25 మంది మృతి చెందగా, 2022లో 45 మంది మృతి చెందారు. 2021లో రూ.996.75 కోట్లు, 2022లో రూ.723.14 కోట్ల రూపాయల విలువైన ఆస్తులను ప్రమాదాల్లో కాపాడారు. అదే ఏడాది సికింద్రాబాద్‌ క్లబ్‌లో రూ.15 కోట్లకుపైగా ఆస్తి నష్టం జరిగింది. ఈ ప్రమాదాలు పునరావృతం కావొద్దంటే ప్రజల్లో అవగాహన ముఖ్యమని అధికారులు చెబుతున్నారు.