వచ్చే ఏడాది శ్రీసీతారాముల కల్యాణం ఎప్పుడంటే?

భద్రాచలంలో వార్షిక ఉత్సవాల క్యాలెండర్‌ ఆవిష్కరణ

Bhadrachalam Sri Sita Ramachandra Swamy Kalyanam on April 6th 2025 :భద్రాచలం శ్రీసీతారామచంద్రస్వామివారి దేవస్థానంలో 2025, ఏప్రిల్‌ 6న శ్రీరామనవమి సందర్భంగా సీతారాములవారి వార్షిక కల్యాణం నిర్వహించనున్నారు. ముఖ్యమంత్రి ముత్యాల తలంబ్రాలను, పట్టు వస్త్రాలను తీసుకొచ్చే సంప్రదాయ వేడుక ఇది. ఆ రోజు చంద్రప్రభ వాహనంపై అఖిలాండకోటి బ్రహ్మాండ నాయకుడి తిరువీధి సేవ ఉంటుంది. అదే రోజున శ్రీరామ దీక్షలను భక్తులు స్వీకరిస్తారు. ఏప్రిల్‌ 7న ఏడాదికి ఒకసారి ఉండే మహా పట్టాభిషేకం చేస్తారు.

భద్రాచలం ఆలయ 2025 వార్షిక క్యాలెండర్‌ను రామాలయం ఈఓ రమాదేవి, ప్రధానార్చకుడు విజయరాఘవన్‌ బుధవారం ఆలయ ప్రాంగణంలో ఆవిష్కరించారు. 10వేల క్యాలెండర్లను ముద్రించారు. ఒక్కోదాని ధర రూ.120. ఇందులో పండుగలతో పాటు రామాలయంలో విశేషంగా నిర్వహించే ఉత్సవాల వివరాలను పొందుపర్చారు. స్వామివారి వేడుకల చిత్రాలు, అనుబంధ కోవెలలలోని విగ్రహాల చిత్రాలతో క్యాలెండర్‌ రూపొందించారు. రూ.75 ధరతో రామాలయ డైరీని సైతం ఆవిష్కరించారు.

2025లో ముఖ్య ఉత్సవాలు ఇలా : జనవరిలో 9న గోదావరిలో హంస వాహనంలో తెప్పోత్సవం ఉంటుంది. 10న ముక్కోటి ఏకాదశి సందర్భంగా ఉత్తరద్వార దర్శన పూజలు చేస్తారు. ఫిబ్రవరి 1 నుంచి 5 వరకు శ్రీ భక్త రామదాసు 392వ జయంత్యుత్సవాలను పురస్కరించుకుని వాగ్గేయకారోత్సవాలను నిర్వహించాలని నిర్ణయించారు.

మార్చి 14న పసుపు కొమ్ములను దంచి తిరు కల్యాణ తలంబ్రాలను కలుపుతారు. అదే రోజు వసంతోత్సవం, డోలోత్సవం చేస్తారు. 30న ఉగాది వేడుకలు నిర్వహించి శ్రీరామ నవమి కల్యాణ బ్రహ్మోత్సవాలను ప్రారంభిస్తారు. ఏప్రిల్‌ 2న ధ్వజపట లేఖనం, 3న గరుడాధివాసం, 4న అగ్నిప్రతిష్ఠ, 5న ఎదుర్కోలు, 8న సదస్యం, 12న చక్రతీర్థం నిర్వహించనున్నారు. మే 22న హనుమజ్జయంతి జరుగుతుంది.