సినీనటుడు అలీకి నోటీసులు జారీ చేసిన గ్రామ పంచాయతీ

సినీనటుడు అలీకి నోటీసులు - అనుమతులు లేకుండా ఫామ్‌హౌస్‌లో నిర్మాణాలు - నోటీసులు జారీ చేసిన ఎక్‌మామిడి గ్రామ పంచాయతీ అధికారులు

Notice to Actor Ali :సినీనటుడు అలీకి తెలంగాణ రాష్ట్రం వికారాబాద్‌ జిల్లాలోని ఓ గ్రామ పంచాయితీ నోటీసులు జారీ చేసింది. ఎలాంటి అనుమతులు లేకుండా నిర్మిస్తున్న ఫామ్​హౌస్​కు సంబంధించి ఈ నోటీసులు జారీ అయ్యాయి. వివరాల్లోకి వెళ్తే.. వికారాబాద్ జిల్లాలోని నవాబ్‌పేట మండలం ఎక్‌మామిడి గ్రామ పంచాయతీ పరిధిలో అలీ నిర్మిస్తున్న ఫామ్‌హౌస్​సుకు ఎలాంటి అనుమతులు లేకుండా నిర్మాణాలు చేస్తున్నారని గ్రామ పంచాయితీ అధికారులు నోటీసుల్లో పేర్కొన్నారు. ఈ మేరకు గ్రామ పంచాయతీ కార్యదర్శి శోభారాణి ఆయనకు నోటీసులు ఇచ్చారు. నిర్మాణాలు ఆపివేయాలని సూచించారు.

Actor Ali Farmhouse Issue :ఎక్‌మామిడి రెవెన్యూ పరిధి సర్వే నెంబరు 345లోని ఫామ్‌హౌస్‌లో నిర్మాణాలకు సంబంధించి పత్రాలను సమర్పించి అనుమతులు పొందాలంటూ గతంలోనే అలీకి నోటీసులు జారీ చేశారు. ఆయన స్పందించకపోవడంతో తాజాగా మళ్లీ రెండోసారి పంచాయతీ కార్యదర్శి నోటీసులు ఇచ్చారు. నిర్మాణానికి సంబంధించిన ధ్రువ పత్రాలను సమర్పించి అనుమతులు పొందాలని సూచించారు. లేని పక్షంలో పంచాయతీరాజ్‌ చట్టం ప్రకారం చర్యలు తీసుకుంటామని పేర్కొన్నారు.