Virat Kohli Phone Wallpaper:టీమ్ఇండియా స్టార్ బ్యాటర్ విరాట్ కోహ్లీ ఫోన్ వాల్పేపర్ ప్రస్తుతం నెట్టింట హాట్ టాపిక్గా మారింది. నీమ్ కరోలీ బాబా ఫొటోను విరాట్ తన ఫోన్లో వాల్పేపర్గా ఉంచుకున్నాడంటూ నెటిజన్లు సోషల్ మీడియాలో పోస్ట్ చేస్తున్నారు. మరి ఈ నీమ్ కరోలీ బాబా ఎవరు? ఆయన ఫొటోను విరాట్ ఎందుకు వాల్పేపర్గా సెట్ చేసుకున్నాడో నెటిజన్లు తెలుసుకోవాలనుకుంటున్నారు. మరి ఈయన ఎవరంటే?
నీమ్ బాబా కరోలి 1900లో జన్మించారు. అప్పట్లో ప్రజలకు ఆయన ఆధ్యాత్మికంగా దగ్గరయ్యారు. ఆయనను హనుమంతుని అవతారమని ప్రజలు నమ్ముతారు. బాబా కరోలి 1964 ఉత్తరాఖండ్ కైంచిలో తొలి ఆశ్రమాన్ని స్థాపించారు. ఉత్తరాఖండ్ సహా ఉత్తర్ప్రదేశ్, దిల్లీల్లో కూడా ఆయన ఆశ్రమాలు ఉన్నాయి. మనిషి సంతోషంగా ఉండేందుకు జీవితంలో ఎలా ఉండాలో బాబా కరోలి అప్పట్లో లోకానికి చెప్పారంట. నమ్మకాన్ని ఎప్పుడూ కోల్పోవద్దని డబ్బు, సమయాన్ని ఎలా వినియోగించుకోవాలని ప్రజలకు బోధించేవారని తెలుస్తోంది. ఇక 1973లో ఆయన మృతి చెందారు.
అయితే విరాట్ గతంలో భార్య అనుష్క శర్మతో కలిసి ఉత్తరాఖండ్లోని బాబా కరోలీ ఆశ్రమాన్ని సందర్శించారు. కెరీర్లో ఫామ్ కోల్పోయినప్పుడు ఈ ఆశ్రమానికి విరాట్ వెళ్లాడట. దీంతో కోహ్లీ బాబా కరోలి ద్వారా ప్రేరణ పొంది ఉండవచ్చని నెటిజన్లు అంటున్నారు. ఈ నేపథ్యంలో ఆయనకు గౌరవంగా బాబా ఫొటోను కోహ్లీ, వాల్పేపర్గా పెట్టుకొని ఉండవచ్చని అంటున్నారు. కేవలం విరాట్ కోహ్లీయే కాకుండా ఫేస్బుక్, ఆపిల్ సీఈవోలు మార్క్ జుకర్బర్గ్, స్టీవ్ జాబ్స్ కూడా బాబా కరోలీని ఆచరిస్తారని సోషల్ మీడియాలో చర్చ సాగుతోంది.