నిరుద్యోగులకు అల్టర్- IBPS ఎగ్జామ్​ క్యాలెండర్ రిలీజ్- కచ్చితంగా తెలుసుకోవాల్సిన డేట్స్ ఇవే!

ఐబీపీఎస్-2025 పరీక్షల షెడ్యూల్ విడుదల- ఆరు విభాగాల్లో ఉద్యోగాల భర్తీకి ప్రణాళిక సిద్దం

IBPS Exam Calendar 2025 : నిరుద్యోగులకు శుభవార్త. 2025 సంవత్సరానికి సంబంధించి ప్రాంతీయ గ్రామీణ బ్యాంకులు (ఆర్‌ఆర్‌బీ), ప్రభుత్వ రంగ బ్యాంకుల(పీఎస్‌బీ)లలో చేపట్టనున్న ఉద్యోగాల భర్తీకి సంబంధించిన క్యాలెండర్‌ విడుదలైంది. ఈ నోటిఫికేషన్‌ను ఇన్‌స్టిట్యూట్ ఆఫ్ బ్యాంకింగ్ పర్సనల్ సెలక్షన్ (ఐబీపీఎస్) విడుదల చేసింది. పీఎస్‌బీలకు సంబంధించిన ఆన్‌లైన్ ప్రిలిమినరీ, మెయిన్స్ పరీక్షల తేదీల వివరాల కోసం అధికారిక పోర్టల్‌ను చూడొచ్చు. ఆయా బ్యాంకుల్లో ఆఫీసర్ స్కేల్ 1, 2, 3, ఆఫీస్ అసిస్టెంట్లు వంటి ఉద్యోగాలను భర్తీ చేయనున్నారు. ప్రాంతీయ గ్రామీణ బ్యాంకుల్లో ప్రొబేషనరీ ఆఫీసర్లు, మేనేజ్‌మెంట్ ట్రెయినీలు, స్పెషలిస్ట్ ఆఫీసర్లు, వినియోగదారుల సేవా సహాయకుల వంటి పోస్టుల భర్తీని చేపట్టనున్నారు.

ఐబీపీఎస్ పరీక్షల వివరాలు

• ఆఫీసర్ స్కేల్ 1 : ప్రాంతీయ గ్రామీణ బ్యాంకులు, ప్రభుత్వ రంగ బ్యాంకులలో ఆఫీస్ అసిస్టెంట్లు, ఆఫీసర్ స్కేల్ 1, 2, 3 స్థాయి ఉద్యోగాల భర్తీకి ఉమ్మడిగా ప్రిలిమినరీ పరీక్షలు జరుగుతాయి. ఆఫీసర్ స్కేల్ 1 స్థాయి పోస్టులకు దరఖాస్తు చేసేవారికి ఈ ఏడాది జులై 27న, ఆగస్టు 2, 3 తేదీల్లో ప్రిలిమినరీ పరీక్షలను నిర్వహిస్తారు. దీనికి సంబంధించిన మెయిన్స్ పరీక్ష నవంబరు 13న జరుగుతుంది.
• ఆఫీసర్ స్కేల్ 2, 3 : ఈ పోస్టులకు సంబంధించిన పరీక్ష తేదీల అంచనాలను ఐబీపీఎస్ విడుదల చేయలేదు. ప్రిలిమినరీ పరీక్షలో అర్హత సాధించే వారికి నవంబరు 13న మెయిన్స్ పరీక్ష ఉంటుంది.
• ఆఫీస్ అసిస్టెంట్స్ : ఈ పోస్టులకు దరఖాస్తు చేసుకునే వారికి ఆగస్టు 30, సెప్టెంబరు 6,7 తేదీల్లో ప్రిలిమినరీ పరీక్షలను నిర్వహిస్తారు. దీనిలో అర్హత సాధించే వారికి నవంబరు 9న మెయిన్స్ పరీక్ష జరుగుతుంది.
• ప్రొబేషనరీ ఆఫీసర్లు/మేనేజ్‌మెంట్ ట్రెయినీలు : ఈ ఉద్యోగాలకు దరఖాస్తు చేసే వారికి అక్టోబరు 4, 5, 11 తేదీల్లో ప్రిలిమినరీ పరీక్షలు జరుగుతాయి. మెయిన్స్ పరీక్ష నవంబరు 29న జరుగుతుంది.
• స్పెషలిస్ట్ ఆఫీసర్స్​ (SPL): ఈ పోస్టులకు అప్లై చేసే వారికి నవంబరు 22, 23 తేదీల్లో ప్రిలిమినరీ పరీక్షలు జరుగుతాయి.2026 సంవత్సరం జనవరి 4న మెయిన్స్ పరీక్షలు జరుగుతాయి.
• కస్టమర్ సర్వీస్ అసోసియేట్స్ (CSA) : ఈ పోస్టులకు దరఖాస్తు చేసే వారికి డిసెంబరు 6,7, 13, 14 తేదీల్లో పరీక్షలు ప్రిలిమినరీ జరుగుతాయి. మెయిన్స్ పరీక్ష 2026 ఫిబ్రవరి 1న జరుగుతుంది.

ఐబీపీఎస్ పోర్టల్‌లో దరఖాస్తు ఇలా
ప్రాంతీయ గ్రామీణ బ్యాంకులు, ప్రభుత్వ రంగ బ్యాంకులలో ఉద్యోగాలకు అర్హులైన వారు ఐబీపీఎస్ అధికారిక పోర్టల్ (https://ibps.in/) ద్వారా ఆన్‌లైన్‌లో దరఖాస్తును సమర్పించాలి. ప్రిలిమినరీ, మెయిన్ పరీక్షల కోసం ఒకసారి దరఖాస్తు చేస్తే సరిపోతుంది. దరఖాస్తుతో పాటు అభ్యర్థి తన ఫొటో, సంతకం, వేలిముద్రలు, చేతితో రాసిన డిక్లరేషన్‌ను స్కాన్ చేసిన కాపీని అప్‌లోడ్ చేయాలి. దరఖాస్తు చేసే సమయంలో అభ్యర్థి లైవ్ ఫొటోను వెబ్ క్యామ్ లేదా మొబైల్ ఫోన్ ద్వారా తీసుకుంటారు.