మీ క్రెడిట్ కార్డు లిమిట్ తక్కువగా ఉందా? ఇలా చేస్తే​ ఈజీగా పెరుగుతుంది! - How To Increase Credit Card limit

How To Increase Credit Card limit : ప్రస్తుత కాలంలో పెరుగుతున్న ఖర్చులు, ఆర్థిక అవసరాలరీత్యా క్రెడిట్ కార్డులు ఎంతగానో ఉపయోగపడుతున్నాయి. అందుకే ఇటీవల కాలంలో క్రెడిట్ కార్డులు వినియోగం మరింత పెరిగింది. ఈ క్రమంలో క్రెడిట్ లిమిట్​ను పెంచుకోవాలంటే ఏం చేయాలో తెలుసుకుందాం పదండి.

How To Increase Credit Card limit :మన జీవితంలో అకస్మాత్తుగా అనేక ఆర్థిక అవసరాలు వస్తుంటాయి. అటువంటి అత్యవసర పరిస్థితుల్లో మన దగ్గర డబ్బులు ఉండకపోవచ్చు. అలాంటి పరిస్థితుల్లో క్రెడిట్‌ కార్డులు ఎంతగానో ఉపయోగపడతాయి. ప్రస్తుతం క్రెడిట్‌ కార్డులు నిత్యావసరంగా మారాయి. ఈ రోజుల్లో చెల్లింపులు చేయడానికి పెద్ద సంఖ్యలో ప్రజలు క్రెడిట్‌ కార్డులను వినియోగిస్తున్నారు. అయితే క్రెడిట్ కార్డులను బ్యాంకులు కొంత లిమిట్​తో తమ కస్టమర్లకు అందిస్తాయి. వీటిని జారీ చేసే ముందు కొన్ని విషయాలను పరిగణనలోకి తీసుకుంటాయి. అందులో వ్యక్తి ఆదాయం, సకాలంలో చెల్లింపులు చేయడం లాంటివి ప్రధానంగా ఉంటాయి. ఇలాంటి వాటిని మేనేజ్​ చేస్తే క్రెడిట్​ కార్డు లిమిట్ సులభంగా పెరుగుతుంది!.

సకాలంలో బకాయిల చెల్లింపులు
రుణదాతలు క్రెడిట్ కార్డు లిమిట్​ను పెంచేందుకు, కొత్తగా ఇచ్చేందుకు మీ క్రెడిట్ హిస్టరీని నిశితంగా పరిశీలిస్తారు. అందుకే మునుపటి నెలల నుంచి క్రెడిట్ కార్డు బిల్లుల బకాయిలు ఏవైనా ఉంటే కట్టేయాలి. గడువు తేదీకి ముందే బిల్లులను పూర్తిగా చెల్లించేందుకు ప్రయత్నించండి. సకాలంలో క్రెడిట్ కార్డు బిల్లులు కట్టేయడం వల్ల బ్యాంకులు, కార్డు జారీ సంస్థలు లిమిట్​ను పెంచే అవకాశం ఉంటుంది.

క్రెడిట్ వినియోగం
క్రెడిట్ బ్యూరో సంస్థ‌లు ప‌రిగ‌ణ‌నలోకి తీసుకునే ముఖ్య‌మైన అంశాల్లో క్రెడిట్ యుటిలైజేష‌న్ రేషియో (సీయూఆర్) కూడా ఒక‌టి. క్రెడిట్ కార్డు కస్టమర్​కు అనుమితించిన‌ ప‌రిమితిలో ఎంత మొత్తం వినియోగించారో సీయూఆర్ తెలియ‌జేస్తుంది. అందుకే సీయూఆర్ 30 శాతానికి మించనివ్వొద్దు. తక్కువ సీయూఆర్ వినియోగం కూడా క్రెడిట్ కార్డు పరిమితిని పెంచడంలో సాయపడుతుంది. అందుకే తక్కువ సీయూఆర్ తక్కువ ఉండేలా చూసుకోవాలి.

ఆదాయం
క్రెడిట్ లిమిట్​ను పెంచే విషయంలో రుణదాతలు కస్టమర్ల ఆదాయాన్ని కూడా పరిగణనలోకి తీసుకుంటారు. మీ ఆదాయం ఇటీవల పెరిగినట్లైతే అందుకు సంబంధించిన ఫ్రూఫ్​ను క్రెడిట్ కార్డు జారీ సంస్థలకు అందజేయాలి. అప్పుడు క్రెడిట్ కార్డు లిమిట్ పెరిగే అవకాశం ఉంటుంది.

ఈఎమ్​ఐల ప్రభావం
క్రెడిట్ కార్డు పరిమితిని పెంచమని జారీ సంస్థలను కోరే ముందు హోమ్ లోన్, వ్యక్తిగత రుణం ఈఎమ్​ఐలను తగ్గించుకునే ప్రయత్నం చేయండి. వీలైతే వాటిని కట్టేయండి.

కొత్త కార్డు
మీరు వాడుతున్న ప్రస్తుత క్రెడిట్ కార్డ్‌లో అధిక బ్యాలెన్స్‌ ఉందనుకోండి. అప్పుడు పాత కార్డును అధిక పరిమితితో కొత్త కార్డ్​కు బదిలీ చేయడం వల్ల మీ రుణాన్ని తగ్గించుకోవచ్చు. అలాగే క్రెడిట్ స్కోరు కూడా పెరుగుతుంది.

క్రెడిట్ కార్డ్ లిమిట్​ను పెంచుకోవడం వల్ల కలిగే ప్రయోజనాలు?
క్రెడిట్ కార్డు ప‌రిమితి పెంచుకోవ‌డం వ‌ల్ల అద‌న‌పు మొత్తం మీకు అత్య‌వ‌స‌ర నిధిగా ఉప‌యోగ‌ప‌డుతుంది. అలాగే అనవసర ఖర్చులు చేయకుండా బాధ్యతాయుతంగా క్రెడిట్ కార్డును మెయింటెన్ చేస్తే క్రెడిట్ స్కోరు కూడా పెరుగుతుంది. క్రెడిట్ కార్డు లిమిట్ పెరిగితే ఎక్కువ కార్డులను వాడాల్సిన అవసరం ఉండదు. అదనపు ఛార్జీలు, వార్షిక రుసుములు మిగులుతాయి. ఇది మీ ఆర్థిక నిర్వహణను సులభతరం చేస్తుంది.

లోన్ అప్రూవల్
మంచి క్రెడిట్ స్కోర్, హిస్టరీ ఉండడం వల్ల లోన్​లు సులువుగా మంజూరు అవుతాయి. క్రెడిట్ లిమిట్ పెరగినా సమయానికి బకాయిల చెల్లిస్తే క్రెడిట్ స్కోరు మెరుగుపడుతుంది. తీవ్ర అనారోగ్యం, ఆర్థిక అత్యవసర పరిస్థితుల్లో అధిక క్రెడిట్ కార్డ్ పరిమితి ఉండడం వల్ల అత్యవసర నిధులు సమకూరుతాయి. అలాగే బ్యాంకులు తరచుగా క్రెడిట్ లిమిట్ ఎక్కువగా ఉన్న కస్టమర్లుకు రివార్డులను అందిస్తాయి.

క్రెడిట్ లిమిట్ పెంపు కోసం ఎలా అభ్యర్థించాలి?
క్రెడిట్ కార్డు జారీ సంస్థలకు క్రెడిట్ లిమిట్ పెంచమని ఆన్​లైన్, ఫోన్ కాల్ ద్వారా అభ్యర్థించవచ్చు. ఆన్​లైన్​లో అయితే మరింత ఈజీగా పనైపోతుంది. అప్పుడు మీరు మీ ఆదాయ వివరాలకు సంబంధించిన ప్రూఫ్స్ అందించాల్సి ఉండొచ్చు. అలాగే క్రెడిట్ కార్డు జారీ కంపెనీకి కాల్ చేసి లిమిట్ పెంపు విషయాన్ని చెప్పొచ్చు.

క్రెడిట్ కార్డును బాధ్య‌త‌గా వాడుకున్నంత కాలం లిమిట్ పెంచుకోవ‌డం వ‌ల్ల పెద్ద న‌ష్టమేమి ఉండ‌దు. ఖ‌ర్చుల‌పై నియంత్ర‌ణ లేనివారు, క్రెడిట్ కార్డు వినియోగంపై అవ‌గాహ‌న లేని వారు మాత్రం లిమిట్​ను పెంచుకోకపోవ‌డ‌మే మంచిది.