Tamilaga Vettri Kazhagam Flag : తమిళనాడు చెన్నైలోని తమిళగ వెట్రి కళగం(టీవీకే) పార్టీ కార్యాలయంలో నటుడు, పార్టీ అధినేత విజయ్ పార్టీ జెండాను ఆవిష్కరించారు. ఈ ఏడాది ప్రారంభంలో పార్టీని ప్రకటించిన విజయ్, తాజాగా చెన్నైలో తాజాగా పార్టీ జెండా, గుర్తు ఆవిష్కరించారు. ఎరుపు, పసుపు రంగుల్లో ఉన్న ఈ జెండాపై రెండు ఏనుగులు అటూ, ఇటూ ఉన్నాయి.
జెండాలో పైనా, కింద ఎరుపు రంగు, మధ్యలో పసుపు రంగు ఉంది. జెండా మధ్యలో "వాగై" పువ్వు ఉంది. ఇరువైపులా యుద్ధానికి సిద్ధం అన్నట్లుగా రెండు ఏనుగులు ఉన్నాయి. వాగై పువ్వుల దండను సంగం రాజుల కాలంలో విజయానికి గుర్తుగా ధరించేవారు.
పార్టీ జెండాతో పాటు టీవీకే (Tamizhaga Vetri Kazhagam) గీతాన్ని విడుదల చేశారు. ఈ కార్యక్రమంలో ఆయన తల్లిదండ్రులతో పాటు మద్దతుదారులు, అభిమానులు పెద్దసంఖ్యలో పాల్గొన్నారు. అనంతరం పార్టీ కార్యకర్తలతో కలిసి విజయ్ ప్రతిజ్ఞ చేశారు. "మన దేశ స్వాతంత్ర్యం కోసం పోరాడి ప్రాణత్యాగం చేసిన యోధులను, తమిళ నేల నుంచి వెళ్లి మన హక్కుల కోసం అలుపెరగని పోరాటం చేసిన అసంఖ్యాక సైనికులను ఎప్పటికీ గుర్తుంచుకుంటాం. కులం, మతం, లింగం, ప్రాంతం పేరుతో జరుగుతున్న వివక్షను మేం తొలగిస్తాం. ప్రజలకు అవగాహన కల్పించి అందరికీ సమానహక్కులు, అవకాశాల కోసం కృషి చేస్తాం. సమానత్వం అనే సూత్రాన్ని బలంగా సమర్థిస్తాం" అని విజయ్ ప్రతినబూనారు. వచ్చే ఏడాది తమిళనాడు రాష్ట్రంలో అసెంబ్లీ ఎన్నికలు జరగనున్నాయి. ఈ సమయంలో విజయ్ పార్టీ పెట్టడం కీలకంగా మారింది.