உதகையில் களைகட்டிய படகு போட்டி! - OOTY BOAT RACE - OOTY BOAT RACE

நீலகிரி: கோடை காலம் தொடங்கியதிலிருந்து உதகைக்கு சுற்றுலாப் பயணிகள் வந்த வண்ணம் உள்ளனர். அவர்களை மகிழ்ச்சியடையச் செய்யும் வகையில் பல்வேறு கண்காட்சிகளையும், போட்டிகளையும் நடத்தி வருகிறது தமிழக சுற்றுலாத் துறை. இந்நிலையில், தற்போது உதகையில் கோடை விழாவின் அங்கமாக படகு இல்லத்தில் படகுப் போட்டி இன்று தொடங்கப்பட்டது. இந்த போட்டியை நீலகிரி மாவட்ட ஆட்சித் தலைவர் மு.அருணா கொடி அசைத்து துவக்கி வைத்தார்.

இந்த போட்டியில் ஆண்கள், பெண்கள், தம்பதியர் என பலரை உள்ளடக்கி, ஒவ்வொரு பிரிவின் கீழ் போட்டிகள் நடத்தப்பட்டது. 
மேலும், இந்த படகு போட்டியில் வித்தியாசமான முறையில் ஆண்கள் இரட்டையர்கள் போட்டி, பெண்கள் இரட்டையர்கள் போட்டி, பத்திரிகையாளர்களுக்கான போட்டி மற்றும் படகு இல்லத்தில் பணிபுரியும் ஊழியர்களுக்கான போட்டிகள் நடைபெற்றது. 

இதில் பெண்களுக்கான போட்டியில் பெங்களூரைச் சேர்ந்த ராஜேஸ்வரி, காரைக்காலைச் சேர்ந்த சுசீலா என இருவரும் முதலிடத்தை தட்டிச் சென்றனர். தம்பதியர்களுக்கான படகு போட்டியில் முதல் பரிசை திருப்பூரைச் சார்ந்த அலெக்ஸாண்டர் லதா, துடுப்பு போட்டியில் முதலாம் பரிசை சுரேஷ் என்பவரும், இரண்டாம் பரிசு திலீப் என்பவரும் பெற்றுள்ளனர். வெற்றி பெற்ற அனைவருக்கும் பரிசுகள், கோப்பைகள் வழங்கப்பட்டது.