ரிலையன்ஸ் இண்டஸ்ட்ரீஸ் (Reliance Industries) நிறுவனத்தின் தலைவர் முகேஷ் அம்பானி (Mukesh Ambani), ஆசியாவின் பணக்காரர்கள் பட்டியலில் முதல் இடத்தில் உள்ளார். அதேபோல உலகப் பணக்காரர்களின் பட்டியலில் 11-ஆவது இடத்தைப் பிடித்திருக்கும் இவர் தற்போது விலை உயர்ந்த போயிங் 737 மேக்ஸ் 9 (Boeing 737 MAX 9) எனும் தனியார் விமானத்தை வாங்கியது அனைவரின் கவனத்தையும் ஈர்த்துள்ளது. இந்தியாவில் இதுவரை யாரும் இந்த தனியார் விமானத்தை சொந்தமாக வாங்கியதில்லை என்பது குறிப்பிடத்தக்கது.
இதுவரை யாரும் அரங்கேற்றாத வகையில் ஆடம்பரத் திருமணத்தை தன் மகனுக்கு சமீபத்தில் செய்துவைத்து செய்திகளில் தொடர்ந்து வலம்வந்த இவர், தற்போது வாங்கியிருக்கும் தனது விலை உயர்ந்த 10-ஆவது தனியார் ஜெட் விமானத்தால் செய்திகளில் இடம்பிடித்துள்ளார். அந்தவகையில், அவர் வாங்கியிருக்கும் போயிங் 737 மேக்ஸ் 9 விமானத்தை குறித்து இணையவாசிகள் தேடி வருகின்றனர். எனவே அதன் முழு விவரங்கள் என்ன என்பதைப் பார்க்கலாம்.
போயிங் 737 மேக்ஸ் 9 விமானத்தின் சிறப்பம்சங்கள் (Boeing 737 Max 9 specifications):
- போயிங் 737 மேக்ஸ் 9 உலகின் மிக விலை உயர்ந்த ஜெட் விமானங்களில் ஒன்றாகும்.
- இது CFM International நிறுவனத்தால் தயாரிக்கப்பட்ட இரண்டு LEAP-1B என்ஜின்களால் இயக்கப்படுகிறது.
- இதன் MSN எண் 8401 ஆகும்.
- இதனால் சிங்கிள் டேக்கில் 3,300 நாட்டிகல் மைல், அதாவது 6,110 கிலோமீட்டர்கள் பறக்க முடியும்.
- அதிகமாக இதில் 220 இருக்கைகளைப் பொருத்தலாம்.
- இதன் நீளம் 138 அடி 4 அங்குலமாக (138 ft 4 in) உள்ளது.
- இறக்கையின் நீளம் (Wingspan) 117 அடி 10 அங்குலம் (117 ft 10 in) ஆகும்.
போயிங் 737 மேக்ஸ் 9 விலை என்ன?
போயிங் 737 மேக்ஸ் 9 விமானத்தின் அடிப்படை விலை 118.5 மில்லியன் டாலர்கள் ஆகும். இந்திய மதிப்பில் இதன் விலை சுமார் ரூ.987 கோடி இருக்கும். இதில் மேற்கொள்ளப்பட்டிருக்கும் கேபின் மாற்றங்கள், உள்புற அமைப்பின் வேலைப்பாடுகள் செலவு, விமானத்தின் விலையை மேலும் உயர்த்தும் என்று கூறப்படுகிறது. பெரிய கேபின், பொருள்கள் வைப்பதற்கு பெரிய இடவசதி என அம்பானி குடும்பம் பயணம் செய்வதற்காக மறுசீரமைக்கப்பட்ட உள்புற கட்டமைப்பைச் சேர்த்து, இந்த தனியார் விமானத்தின் விலை ரூ.1,000 கோடியைத் தாண்டும் என செய்தி வெளியாகியிருக்கிறது.